Douane ta muda awe pa nan edificio ‘nobo’

ORANJESTAD- Si tur cos ta bon, entrante awe departamento di douane ta muda den nan edificio ‘temporal’ unda cu ‘DA’ ta situa. Pues Budlex Building. Despues cu finalmente Setar N.V. a termina e instalacionnan necesario di telecomunicacion pa cuerpo di duana na ‘Budlex Building’ (edificio DA), e proceso di mudansa desde e oficina central a continua diabierna y durante henter fin di siman. Segun Minister Bermudez tur cos ta indica cu pa dialuna e proceso aki mester ta finalisa.

PA DOS AÑA

E mandatario di finanzas ta calcula cu e departamentonan aki di e oficina central lo permanece na e edificio temporal pa no mas di 2 aña. “E tereno na Barcadera ta disponibel caba, sin embargo ta e diseño mester bin cla, pa despues scoge e contratista y di e forma aki e construccion lo wordo realisa. Mi ta spera cu pa inicio di 2017, duana por ta ubica na e edificio nobo y moderno na Barcadera”, asina Minister Bermudez a expresa.

MANIFIESTO

Na Januari di e aña aki cuerpo di duana a entrega un manifiesto na Minister Bermudez cu varios punto di preocupacion di cual e mandatario a sigura recientemente cu tur tin su debido atencion y un gran mayoria a wordo cumpli cun’e caba.

CONDICION DI EDIFICIO

Un di e puntonan principal cu e duaneronan a trece padilanti tabata e situacion di nan edificio decai cu actualmente ta den ehecucion mientras tanto Duana Recherche tambe a ricibi dos cacho nobo y desde luna di Mei Sr. Ricky Croes a keda nombra como director fiho di e departamento aki.

CUMPLIENDO

“Nos ta trahando riba e puntonan di e manifiesto cu ta toca na e funcion completo di duana y mi ta spera cu riba un termino relativamente corto nos por cumpli cu tur pa asina ey cuerpo di duana por funciona debidamente”, asina Minister Bermudez a sigura.

REORGANISACION

Segun e mandatario ambos departamento mester pasa den un proceso di reorganisacion pa nan por fungi a base di e normanan moderno cu awendia ta wordo exigi internacionalmente y esey ta e reto. “Di mi banda mi ta dunando tur sosten pa e reto aki wordo realisa na fabor di e departamentonan”.