Victima di accidente di porta merdia, a fayece anochi

ORANJESTAD - E homber cu a keda herida ora cu un porta di hero a cay riba dje na Kadushi Largo, a fayece awe nochi a consecuencia di e heridanan ricibi. Ta trata di Luis Bernardo Carrion (65). For di comienso tabata teme pa su bida. Anochi trempan a dune Santa Olio, y pa algo prome cu 9'or y mei, dr Croes a constata morto di sr Carrion. 

E CASO

Tabata diadomingo atardi algo pasa di 4'or, brandweer, polis y ambulance a wordo manda cu hopi urgencia na un cas na Kadushi Largo. E motibo tabata un porta grandi di cura cu a cay riba un persona, y e persona no tabata reacciona. Na yegada nan a bin compronde cu esnan na e sitio mes a lanta e porta di cura for di riba e meneer di edad.

TRAHA CU VICTIMA

Mesora personal di ambulance a cuminsa traha cu e victima y a dicidi di transporte cu urgencia pa hospital. Un personal di brandweer a bay cu e victima den ambulance pa asina asisti personal di ambulance pa duna e victima CPR mientras cu e ambulance tabata bayendo direccion di hospital. E persona ta un meneer di edad y ta den un situacion hopi critico. Polis a pidi presencia di slachtofferhulp pa asisti e famia den nan dolor e momento ey. Condolencia na famianan di e fayecido.