Tres pasahero Colombiano cu a pasa Aruba riba barco crucero, ta ‘perdi’ despues di a yega Tortola

TORTOLA – Tres pasahero biahando riba e barco crucero Norwegian Sky ta raporta como perdi despues cu e siman aki e barco a pasa Tortola, Isla Virgen Britanico. E barco prome cu esey a pasa Aruba tambe, pero ta na Tortola a sinti nan falta. E polis local a cuminsa un buskeda di e tres personanan, di nacionalidad Colombiano. Ta trata di Jean Carlo Ospina Cano, Pamela Mesa Escobar, y Yesica Yojana Marin Ramirez. No ta conoci si nan ta famia y si nan a keda tera ‘intencionalmente’ of si algo por a pasa nan. 

LAGA ATRAS

Ora cu e ora a yega pa e barco bandona e isla, e tripulantenan a notifica cu e tresnan aki no a bolbe. No ta inusual cu turistanan ta keda atras, sea pasobra nan a yega bek laat, y ta sea biaha pa e proximo parada di e barco of ta bay e pais bek di origen. Normalmente un barco crucero ta warda maximo 15 minuut pa e pasaheronan, y despues ta bay. Ta responsabilidad di cada pasahero pa ta bek na tempo. Y e barco tin responsabilidad pa esnan cu si a bolbe na tempo, pa sali na ora. Tabatin 2004 persona abordo ora cu e barco su biahe a cuminsa. 

E ITINERARIO

E colombianonan cu a ‘perde’ tabata forma parti di un crucero di 14 dia cu a bishita Aruba, Corsou, Barbados,  St. Lucia Island; St. Johns, Antigua; St. Kitts and Nevis; y Philipsburg, St. Maarten. E trio tabata poni pa baha na final di e crucero na La Romana, Republica Dominicano, hunto cu tur otro pasahero.