Awe ta recorda cu 4 aña pasa Aruba y Corsou a raporta nan prome casonan di Covid19

ORANJESTAD – Awe ta cuater aña pasa cu Aruba y Corsou a keda confronta cu nan prome casonan ‘positivo’ di Coronavirus, conoci como Covid19. Mientras cu Corsou a raporta su prome caso den ora di mainta, merdia Aruba a confirma su prome caso. For di e momento ey, cos a cambia totalmente pa Aruba y resto di mundo pa e proximo dos añanan. E prome caso pa Aruba tabata un persona di afo, cu tabata na Aruba pa trabou, y tambe a bira e prome morto despues cu e la bandona Aruba. Corsou su caso tabata uno importa di un persona cu a bin for di Hulanda.