Gobierno: Fitch no ta ilustra bista real di Aruba

ORANJESTAD – “Nos ta di opinion cu e informe di Fitch no ta ilustra e bista economico real di Aruba, no a tene cuenta cu e diferente medidanan fiscal, economico y structural importante cu nos a tuma pa reduci e deficit di Aruba den 2014”. E prome reaccion di gobierno di Aruba riba e rapport di Fitch Rating di diaranson merdia, unda cu a bisa cu a degrada Aruba di BBB pa BBB-. Segun gobierno, ademas Fitch Ratings no ta reconoce e compromiso di gobierno pa sigui riba e caminda pa un sistema fiscal sostenibel a termino medio. “ Nos ta comprometi pa sigui traha cu Fitch Ratings pa nan por yega na un miho comprondemento di nos logronan y tambe nos progreso pa logra nos meta cu tempo” e reaccion ta finalisa bisando.

Minister saliente di finanzas Juan David Yrausquin, a mustra cu Gobierno di pais Aruba ta reitera su compromiso pa cu e plan di consolidacion fiscal. A repasa e loke cu gobierno a haci te cu awor, cu a pone e isla na unda cu e ta aworaki. Entre nan, inverti den durabilidad di e pais, por medio di inversionnan significativo den renobacion urbano, infrastructura, y proyectonan di energia sostenibel.” NoticiaCla a compronde cu representantenan di Standard & Poor’s ta na Aruba awor, y cu dentro di poco lo por spera un rapport di nan tambe.