Na Corsou, victima di secuestro a bira sospechoso di traficacion di droga

WILLEMSTAD - E kaso di sekuestro di un komersiante den área di Veeris di dia 10 di yanüari último a kue un otro rumbo. E komersiante mes awor a keda detené sospechá di trafikashon di droga na nivel lokal i internashonal.

Segun e informe di polis, ayera djamars 12 di mart 2024 den oranan di mainta trempan, e Divishon di Krímen Organisá di Kuerpo Polisial riba òrdu di Fiskal di Ministerio Públiko Kòrsou konhuntamente ku KMar, Duana, Defensa i R.S.T. a tene diferente entrada hudisial na dos bibienda i sinku kompania.

Esaki tabata den kuadro di un investigashon relashoná ku trafikashon di droga riba nivel lokal i internashonal.

A bai den área di Sta. Catharina, Janthiel, Seri Loraweg, Sta. Rosa, Veeris, Buena Vista i Sta. Maria, i na un di e adrès nan aki a hasi detenshon di e hòmber M.J.A.T., di 41 aña di edat nasé na Kòrsou (e komersiante sekuestrá dia 10 di yanüari 2024) enkonekshon ku e kaso ariba menshoná. Na e sitionan a haña i konfiská diferente artíkulo ku ta di importansia pa e investigashon.Investigashon den e kaso aki ta kontinuá i no ta ekskluí ku lo bai tin mas detenshon. A presentá e sospechoso dilanti di un fiskal ouksiliar ku a ordená su enkarselamentu pendiente di mas investigashon.

Informashonnan adishonal

Informashonnan ku EXTRA ta disponé ta indiká ku e historia di e sekuestro ku e komersiante lo a presentá na polis tabata un poko “too good to be true”. El a keda sekuestrá pa tres hòmber i nan a bai kuné den un outo koló kòrá. Su negoshi ta keda na Veeris i ta atendé ku unifòrm. E historia ku a bin dilanti tabata indiká ku ta un trahadó di dje ku e tin problema kuné a orkestrá e sekuestro pa medio di algun amigu.

Sinembargo e detenshonnan tabata kai un tras di otro. Asta tabatin hende ku a keda detené na Ulanda. Te ku dia 28 di febrüari tabatin 8 detenshon di kual un señora di 61 aña polis parse a laga bai. Ta masha hopi entrada hudisial tabatin relashoná ku e kaso di sekuestro. Pero e kaso a bira poko dudoso segun nos fuentenan pa e forma kon e pago na e sekuestradónan a bai. Ta basta sèn parse famia lo a saka hopi lihé pa por a paga pa laga e komersiante den libertat, EXTRA a komprondé ku polis a haña poko remarkabel i tambe kuestionabel unda a saka tantu sèn asina, i asina rápido.

I manera e dicho ta bisa “entre shelu i tera nada ta keda skondí”. A resultá ku ta trafikashon di droga na nivel lokal i internashonal. Aki tambe parse tabatin asuntu di ponementu di droga den kònteiner, droga a disparsé i awor doñonan di droga ke nan kos bèk. Parse ta un organisashon formal di trafikashon di droga tabatin i polis no ta ekskluí e posibilidat di mas detenshon. NOTA: Texto ta scirbi den Papiamento fonetico di Corsou.