Gobierno a firma cu ELMAR pa reemplaza tur auto di gobierno pa auto electrico

ORANJESTAD – Gobierno di Aruba a firma cu ELMAR pa trahadonan di departamento di gobierno usa autonan electrico solamente. E intencion ta pa cuminsa prome cu e departamento economico DEACI, pero e plan final ta pa tur auto di gobierno pa autonan electrico.  

STACION DI CARGA

Pa prome biaha N.V. ELMAR lo instala stacionnan di recarga vehiculonan electrico, riba propiedad priva pa un departamento di gobierno, den e caso aki pa Departamento di Asuntonan Economico ("DEACI") cu ta resorta bou di Minister Geoffrey Wever.  "Instalaccion di stacionnan di recarga autonan electrico ta e prome paso", segun minister Wever.

PILOTO 

Awo a cuminsa cu e proyecto piloto aki conhuntamente cu N.V. ELMAR, y proximamente e autonan di trabou di DEACI lo wordo reemplasa cu autonan electrico conoci como 'EV’s' ('Electric Vehicles'). Segun e minster, e paso aki lo resulta den un reduccion significativo den uso di gasolin cu ta contribui grandemente na polucion di nos medio ambiente. E iniciativa aki ta parti di e esfuerso continuo di parti di ministerio pa promove sostenibilidad activamente y cu ta sirbi como ehempel con pa crea un Aruba mas sostenibel.

N.V. ELMAR tin su servicio di EV ChargeUp; su red di cargador pa vehiculonan electrico rond di Aruba. N.V. ELMAR por medio di e acuerdo aki, lo facilita e instalacion di stacionnan di recarga pa autonan eletrico, cual ta sirbi como un modelo cu lo por ser replica pa otronan den sector publico of priva, y asina yuda acelera e transicion pa un economia mas sostenibel, segun Minister Wever.

“Mi ta hopi contento cu nos por anuncia e iniciativa aki awe, ya cu cada paso padilanti ta crucial den nos afan pa construi un futuro sostenibel pa nos yiunan. E ta pone e standard y e ehempel pa nos comunidad: cu tur hende mester tuma accion pa adapta y inclui sostenibilidad den nan bida diario. Mi ta spera cu otro departamentonan di gobierno copia e modelo aki," Minister Wever a conclui.