ANALISIS: Caso AGF/Gobierno vs RIU/Carlson Group

ORANJESTAD –Aruba Growth Fund (AGF) y gobierno di Aruba (GOA) ta topa RIU hotel y Radisson hotel den corte dialuna mainta. E meta: para e benta di Carlson Group (doño di Raddison) cu RIU, y asina evita cu ta converti e (otro) hotel bisiña di RIU den un all inclusive tambe. Den mesun rosea, tanto gobierno como Aruba Tourism Authority (ATA) ta sigura cu nan ta ‘respeta negoshacion entre dos partido priva’. Solamente cu den e caso aki, segun gobierno (y ATA), ta sinti cu interes general no ta wordo sirbi cu e (posibel) deal entre Carlson Group y RIU hotel. Mes momento un campaña contra RIU a inicia riba rednan social (pa afiliadonan di partidonan politico opuesto), pa boycot e hotel RIU pa cu su ‘intention’.

INTENTO DI GOBIERNO

Gobierno den su intento pa para e deal menciona, ta argumenta e.o. cu tin acuerdonan riba papel, cu tanto RIU y Radisson ta na altura di dje, riba ‘regulacion di all inclusive’. Gobierno (lesa Otmar Oduber) ta referi na un asina yama ‘maneho publica’, cu ta stipula cu un hotel cu tin intencion di bay all inclusive awendia, mester aprobacion di e minister en cuestion (turismo). Sin e dicho permiso, e hotel aki no por cambia su concepto sin mas. Tambe gobierno di Aruba a referi na e moratorium ‘considera’, y cu e maneho publica, ta e ‘preambulo’ pa e moratorium. Na final, gobierno ta admiti cu e ta den man di huez, y cu ‘ta spera cu sano huicio prevalece, y evita cu expansion di all inclusive continua den e zona ya existente. Esaki ta nifica segun gobierno, cu si huez determina otro, cu e por crea un precedente pa otro hotelnan cu kier haci mescos.

ARUBA GROWTH FUND

Aruba Growth Fund, den e caso aki ta e partido principal pasobra e ta esun cu a entama Carlson Group pa ‘incumplimento’ di terminonan di negoshacion diabierna. Cana bay di mesa di negoshacion den e fase final segun AGF, simplemente no ta aceptabel. Sigur no, si no tin ningun señal cu e negoshacionnan no ta yegando na algo concreto. “E placa tey caba y ta sigura”, un di e directornan socio, Rene Kan, a sigura NoticiaCla.com ainda diabierna ultimo. Pues placa no ta e problema aki. Por lo menos no segun Kan. Y e intencion ta pa demostra esaki den corte dialuna awor. AGF mester demostra na huez, cu Carlson Group no ta cumpliendo, y cu nan ta ‘violando’ un proceso di negoshacion riba tur base. No ta descarta cu si e deal entre Carlson Group y RIU hotel ta ‘firma’ y un ‘done deal’, cu huez por declara e acuerdo aki nulo, of impone un daño y perhuicio contra e compania cu lo a viola e reglanan di negoshacion aki. E intento di AGF ta pa para e benta. Y gobierno por solamente ‘sostene’ e intento aki, usando argumentonan pa ‘demostra’ interes general vs interes comercial priva.(Lesa e comentario integral di gobierno aki). Lesa e comentario integral di ATIA aki. Lesa e comentario integral di ATA aki.)