Scarsedad di remedi na Corsou ta keda preocupa pashentnan

WILLEMSTAD - Tin skarsedat di diferente tipo di remedi riba merkado. Informashon ku a yega mesa di redakshon di e portal di noticia di e matutino EXTRA di Corsou ta indiká ku entre otro tin sierto remedi pa diabétiko ku no ta haña na e momentonan aki na Kòrsou.

Pashèntnan ta indiká ku na diferente botika ta informá ku den luna di mei kisas tin e remedi ku nan ta usa atrobe. E skarsedat por ta debí na diferente faktor.

Den kombersashon breve ku EXTRA a hiba ku algun botikario ta bisa na promé lugá ku nan no por papia pa importadónan, pero ta atmití sinembargo ku tin skarsedat di sierto remedi manera remedi pa personanan diabétiko.

Un di e problemanan ku ta kousa e skarsedat ta ku tin sierto remedi pa diabétiko ku ta sumamente popular pa otro tipo di uso, esta pa baha di peso. Personanan ku no ta diabétiko pero tin peso di mas, tambe a kuminsá usa e anguanan aki.

For di sèptèmber 2023 prensa Hulandes a referí na uso di e remedi Ozempic den kombinashon ku un dieta i ehersisio pa asina baha peso. Klínikanan ku ta trata personanan ku problema serio ku nan peso ta preskribí Ozempic pa yuda nan den e proseso di baha peso.

Na un klínika so ku a entrevistá a bisa ku a trata 800 persona ku e Ozempic òf Saxenda den último 2,5 aña. Hulanda tabatin aña pasá 62 mil persona ku ta usa Ozempic. Ta trahando riba un otro remedi, Wegovy, spesial pa personanan ku peso di mas i un otro kondishon médiko relashoná ku esaki manera diabétis òf preshon haltu, pero esaki tambe tin skarsedat di dje.

Rònt mundu pedido pa e remedinan aki òf otronan paresido manera Saxenda, Victoza i ta asina grandi ku no por produsí sufisiente di dje. Ounke ku no ta rekomendabel preskribí remedi pa un meta diferente for di kua e intenshon ta pe, no ta prohibí pa hasi esaki.

Novo Nordisk ku ta e kompania produktor ta bisa ku debí na e oumento den pedido di Ozempic por lo pronto lo tin skarsedat di e remedi aki riba merkado. E kompania a keda di lansa tambe un kampaña pa lanta konsientisashon pa no usa e remedi pa metanan ku e no ta trahá pe, esta pa baha di peso.

Un di e motibunan tambe di e oumento den uso di e remedinan aki ta pasobra “influencers” i artistanan konosí ta influensiá nan siguidónan riba uso di e tipo di remedinan aki.

Na Kòrsou pa algun tempu kaba no por haña Ozempic mas i pashèntnan a pasa riba e angua Victoza. Pero esaki tambe tin un skarsedat di dje aworakí.

Punto ta ku kada bes ku un persona diabétiko kambia di marka di remedi nan kurpa mester di tempu pa ahustá na esaki i nan ta haña diferente tipo di efekto sekundario. Esaki e pashèntnan mes ta indiká na EXTRA.

Pero tin mas problema ku entrega di remedi na mundu. Un otro motibu ta diferente konflikto manera e situashon aktual de “Rode Zee” kaminda tin problema ku pasashi liber di barku pa transportá sea remedi òf produktonan prima pa traha remedi.

Tambe por tin otro motibunan lokal pakiko importadónan no ta (logra) trese remedi Kòrsou. NOTA: E texto ta scirbi den Papiamento fonetico di Corsou.