ORANJESTAD - Señora Nena a nace na 1936 na Colombia bao di e nomber di Edith Elvira Fawcet.
Sra. Nena a bira miembro di Women’s Club of Aruba (WCA) na aña 1985 y tabata miembro pa 39 aña. Nena tabata un miembro masha fiel y casi tur luna e tabata presente na e reunion general di miembrecia y tabata socialisa cu su amiganan di club entre otro Fanny, Emperatriz, Raquel, Selsa, Justine y otronan cu ya no t’ey mas. Nena cu su aparencia semper bunita y elegante y cu su cariño y amabilidad ta trece alegria den e sala.
Nena tabata participa na varios di e actividadnan di Study Group manera bustrip, bishita na museo, etc. Un evento di Study Group cu a keda masha presente pa nos tabata esun di e paisnan representa den WCA. Ora cu Colombia tabata anfitrion di e evento, esaki tabata tremendo cu koffie Colombiano, pasapalo y cuminda Colombiano, musica di cumbia y bunita decoracion geel, blauw, cora, luciendo asina den nan trahe nacional. Den esaki Nena tabata esun cu tabata deleita esnan presente.
Tambe Nena tabata den un grupo di amiga cu yama “Rusty Nails” cu te dia di awe ta existi. Nan tabata bini hunto pa traha entre otro obranan di man pa bende na nos Christmas Bazaar di december pa recauda fondo pa club. Y si tin un reunion general cu tema pa bisti sombre creativo, Nena sigur ta bini cu un masha bunita mes di su mesun creacion.
Nena tabata semper cla pa yuda WCA cu shownan di moda, cu tabata mas tanto den luna di november, y mientrastanto ya Manchito’s a crea un coleccion selectivo pa dama tambe. Mayoria di e shownan di moda tabata cera cu un bunita bisti di bruid, creacion di Nena mes y modela pa su nieta Monique. Di mes cu Manchito’s tabata presente na nos proyecto di “It’s Raining Man” 2014-2016. Pa mas cu un decada, Nena a permiti WCA pa bende ticket pa reunion general y di tur otro proyecto pa recauda fondo, semper Manchito’s tabata un punto di benta bon conoci.
Na varios reunion general di miembrecia of na proyectonan di celebracion di su club stima, Nena tabata deleita esnan presente cu su declamacion. Tur ora e tabata bisa ‘si’ pa declama pa e miembro- y invitadonan, lagando tur cu momentonan hopi alegre y otro cu lagrima na wowo. Hasta tin biaha e ta skirbi pa ocasion special, manera pa e evento di HIV/ AIDS añanan atras. Nena tabata tin un mente masha sano mes; pa menciona cu el a comparti cu nos, despues di un declamacion recien, cu e ta trahando riba un poesia di 38 couplet y mesora tambe el a declama ey mes na mesa algun couplet fo’i cabes. Tabata un poesia di un storia romantico. Claro cu mayoria di su poesianan ta skirbi na Spaño, su lenga materno. Asina nos por mira cu Nena cu tur su ocupacionnan, semper tabata pendiente di su club stima pa coopera mesora.
Na aña 2015 Sra. Nena a keda reconoci como Life Member, manera ta stipula den nos reglamentonan, si bo a cumpli 80 aña y bo ta 30 aña of mas miembro di WCA, bo ta bin na remarca pa bira Life Member. Si bo ta miembro pa 40 aña, tambe esaki ta conta.
Awe cu tristesa na curason, WCA ta tuma despedida di nos miembro y ex-reina stima, un gran dama, un muhe di caracter, un señora cu un curason di oro, cu a pone su talentonan den mocion y a comparti su bondad, cu a stima Aruba y su hendenan. Un gran ehempel pa hopi.
Sosega na paz, Nena stima!
ORANJESTAD - E luna di februari a cuminsa cu un celebracion mas, esta di colega Claudia Arevalo-del Castillo, kende a cumpli 5 aña den servicio cu Botica di Servicio.
SAN NICOLAS – E conocido cantante Malaghy Richardson, conoci como ‘Freddy Rasta’, a bira e Socca Winner di 2025, cu su cancion 1 for Unity, cu e banda Tsunami. Pabien na Freddy Rasta. Na di dos lugar a keda Queen Shine, di tres lugar Galloway, di cuater finalista T-Money y finalmente Blacky cu Groove Masters.
SAN NICOLAS - Durante e ultimo dianan aki Stichting Musica a publica varios video y potret riba nan Facebook page, cu ta duna un bista di e preparacion grandi cu tin tras di Aruba Caiso Soca Monarch 2025. Varios artista a wordo entrevista y ta cla pa duna un tremendo presentacion pa nan fanaticada. Diasabra awor, 8 di februari 2025, un total di 30 artista lo participa den e Soca Finals 2025, acompaña pa 14 banda.
PALM BEACH – Un grupo selecta di prensa e siman aki a experencia e Sunset Grille ‘transforma’ na Hilton Aruba Caribbean Resort & Casino. E restaurant local hopi conoci, a habri su portanan recientemente atrobe despues di un periodo di renobacion extensivo. Y tabata den cuadro di esaki cu e grupo di prensa aki tabata invita. E restaurant su imagen nobo ta un combinacion di elementonan clasico cu un toke moderno. E ta ofrece un ambiente distincto, brindando momentonan inolvidabel pa nos localnan y bishitantenan.
ORANJESTAD – Recientemente gerencia di Joia Aruba by Iberostar a celebra nan apertura oficial di e rooftop bar ZIMA, situa banda di un pisina infinito espectacular cu ta parse di uni cu e horizonte di Caribe. ZIMA ta mustra di ta e lugar perfecto pa relaha, disfruta di un experencia unico di tapas y deleita den e miho bista di e isla.
MIAMI - E artista di Aruba , nomina pa Grammy, Jeon, ta bin bek cu un poderoso colaboracion cu e exito, “Ven Ven”, hunto cu Farruko, Fariana y Alex Sensation. Originalmente graba como un tema solista ‘Savaneta’ pa Jeon y produci p’e reconocido Steve Andreas, e cancion rapidamente a capta e atencion di e figuranan grandi di musica global, acumulando miyones di views y downloads.