UPP: Ambientalista nan mester keda lanta pa vigila gobierno

ORANJESTAD - Union Patriotico Progresista (UPP)  a felicita tur ambientalistanan, activistanan pro Urirama cu e sentencia di dialuna ultimo. Mes momento sinembargo, e lider di e partido Booshi Wever, ta recorda nan pa ‘no bay drumi. Wever ta referi na e sentencia di Hues den e caso di Urirama, na unda a resulta cu e peticion di Windpark Urirama NV ta infunda y cu nan no por usa e permiso otorga, y e parke por lo pronto no por bin mas.

OPINION UPP

UPP mes ta di opinion cu pa loke ta e resultado aki, lo mester keda riba nos “qui vive”, mirando cu den e sentencia claramente ta wordo bisa cu loke ta trata e preocupacion di e habitantenan, esaki no lo wordo atendi, pasobra ya caba e parke no ta bin. “P’esei Hues lo no por duna un opinion of veredicto na e momentonan aki” Wever ta bisa. Esaki lo por bira necesario ora cu e compania bolbe cuminza e procedura pa haya permiso, y den e sentencia ya caba e compania a indica di a cuminsa cu e peticion pa permiso di un parke di molina di 3.3 Mw. P’esei UPP ta bisa cu mester keda lanta, ya cu algun siman pasa Mike E. a grita cu e proyecto ta bay door, ya cu e tin cu cumpli cu 100% green.

PARA PROYECTONAN PPP

Ademas, segun UPP, mirando e rapport di CFT cu e lista grandi di medidanan, nan a urgi Parlamento di Aruba, na momento cu tabata trata e presupuesto, pa obliga gobierno para cu e tipo di proyectonan aki, mescos cu e proyectonan PPP. Pero manera cu por scucha di e.o. parlamentario Rasmijn di AVP, lo cuminsa cu e proceso pa un permiso nobo.

CONTRACTO DI WEB NV

Tambe UPP ta puntra con a para cu e contrato di WEB NV, cu a core firma tambe masha lihe.” Con ta para cu e gastonan cu a wordo haci caba? UPP ta urgi atrobe na Parlamento pa exigi copia di e contrato aki, pa asina Pueblo por wak kico ta e clausula cu tin ora di no cumplimento di e contrato aki, pasobra lo mester tin un clausula cu den tanto tempo WEB lo mester cuminsa haya coriente” Of esaki no ta e caso?

CONTRADICION DI PALABRA

E director di WEB y su experto, ruman di minister Otmar Oduber, segun Wever, a contradeci e ponencia di Mike Eman cu Urirama lo nifica alivio den prijs di coriente, y nan a expresa cu prijs di petrolio mester ta hopi halto mes pa hustifica un inversion miyonario den e proyecto di Urirama. “P’esei UPP ta sugeri si lo no ta na su lugar pa deshaci di e proyecto aki solamente a base di e desaroyo menciona, y esaki sin tuma na cuenta e efecto riba nos medio ambiente, nos panorama natural y salud di e habitante di e barionan di Noord??

Y por ultimo e respet cu mester tin pa e lugar aki, esta e sitio di oracion, meditacion y refleccion, esta e Kapel di Alto Vista?

PARA LOCURA

Segun Wever, a yega momento pa Mike Eman stop cu tur e locuranan cu unicamente ta yuda na destrosa nos pais y hinca nos mas den debe. Den debe cu ta riba lomba di Pueblo ta wordo poni. Mike Eman a bay asina leu di presenta e parke aki como uno cu ta cuadra cu e desaroyo di People, Planet & Profit. Riba su mes un concepto unda cu lo mester sostene desaroyonan unda inversionistanan por haci nan ganashinan, pero semper poniendo nos hendenan y tambe nos mama tera central.