Ryçond Santos Do Nascimento a bolter contra ex colega Gerlien Croes

ORANJESTAD - Parlamentario independiente Ryçond do Nascimento dialuna via un comunicado, a bolter contra ex colega Gerlien Croes, casi un aña despues cu nan dos a bandona e partido berde AVP di cual nan dos tabata forma parti. Esaki ta e prome biaha cu Do Nascimento publicamente ta bay contra su ex colega. E ta recorda tambe cu mientras cu ambos a sali for di e partido berde aña pasa, a dura un luna despues cu Do Nascimento a sali, pa Gerlien Croes tambe haci mescos. Y cu e titulo di cu ‘Ainda Gerlien su curason ta berde’, e la kita tur posibilidad pa nan traha hunto den futuro. Algun punto cu ta resalta di e comunicado, ta cu “ Gerlien, na su turno, no tabatin ningun gana pa bandona AVP dia 17 di april. En bes di expresa problema cu e rumbo corupto, el a expresa di a sinti su mes humilia, pasobra e ancianonan no a invit’e pa un reunion secreto” Do Nascimento ta bisa den su articulo. Segun Do Nascimento, despues di reunion di partido dia 17 di april, Gerlien a dicidi pa negocia mas influencia den partido. “ El a hiba reunionan largo cu Mike Eman. Gerlien tabata tin contacto cu Leoncita Arends yPieter Susebeek y tabatin diferente reunion cu su circulo intimo. Na mes momento reunionnan a tuma luga entre Henny Eman, Hans Sjiem Fat y e omo di Gerlien, esta Duke Croes”. Ademas segun Do Nascimento, ‘Un grupo den Gerlien su circulo intimo a conseha pa no accepta liderazgo di partido AVP, pasobra famia Eman lo manda un di nan mes, Trevor Eman, pa studia derecho pa asina tuma liderazgo di partido over”. Segun e politico independiente, na final di dia Gerlien lo mester a duna poder bek na Trevor, mescos cu Tico Croes mester a duna poder bek na Mike Eman.

BENNY SEVINGER

Cos no ta para aki. Segun Do Nascimento, tambe tabatin preocupacion cu Benny Sevinger tabata preparando su yiu muher pa bira su sucesor politico. Asina Gerlien a anticipa hopi lucha pa poder den partido. Gerlien y Mike ta e uniconan cu sa exactamente e resultado di tur e negociacion aki…” Do Nascimento ta sigui bisa. “ Loke si nos sa, ta cu Gerlien a tarda un luna mas cu Ryçond pa anuncia su retiro for di AVP. Ademas el a anuncia su salida riba dia 15 di mei 2023 den un conferencia di prensa den presencia di Mike Eman. Na final di su anuncio Mike a duna Gerlien un brasa caluroso. Nunca Gerlien a realmente denuncia corupcion den AVP. Tampoco el a e menciona e idiotez pa laga un persona convicto pa soborno sigui representa AVP den parlamento”..

POLITICA SENSASIONALISTA

Segun Do Nascimento, desde cu Gerlien Croes a sali for di AVP el a continua cu e politica sensacionalista di pone enfasis riba su shimis berde y buscando pleito cu ministernan y parlamentarionan di MEP. “ Gerlien ta demostra asina cu su curason ta berde berde ainda. Na december 2023 Gerlien a duna sosten den parlamento na e esfuerso pa proyecta Mike Eman como proximo minister-president. Tur hende por a mira Gerlien mustra su lealtad na e sistema di mentira durante e programa di Enfoke di dia 4 di maart. Ultimo” e ta sigui bisa. “ El a sali gaña henter pais cu Rocco Tjon a introduci un ley pa aumenta detencion di sospechoso penal den celnan di polis te na 20 dia. Ora nos analisa mensahenan di Gerlien for di tempo cu el a laga AVP, e no a haci nada otro sino mustra potret di su mes, mientras cu e ta evita di papia di corupcion, pintando su mes hopi biaha como victima di sexismo”.

PARTIDO NOBO

Ryçond Santos Do Nascimento, ta sigui bisa cu mientrastanto Gerlien Croes a cuminsa un partido nobo hunto cu Daphne Lejuez cu respaldo di un grupo di AVP. “Su partido ta AVP 1.3 diseña pa haya voto di votadornan desilusiona di AVP, pa asina yuda AVP bolbe den poder. Esaki ta e peligernan di mantene un curason berde cu solamente ta anhela poder y exito politico” Do Nascimento ta finalisa bisando den su articulo. Por lesa e articulo completo AKI.