Dos adicto ambulante seriamente herida den accident Pos Chiquito

ORANJESTAD - Diadomingo algo prome cu 2'or di merdia ta sucede un accident basta serio na Pos Chiquito net pazuid di e rotonde. Tres auto tabata para pa subi caminda y nan tras ta bin un Toyota Yaris cu velocidad hopi halto. E chaufeur no por a controla e velocidad y ta dal tras di e pickup cora, cu consecuencia cu e pickup cora ta dal tras di e Hyundai Accent. E Hyunda accent a bay pega contra e Chevrolet Spark Preto cu tabata para mas dilanti.

SITUACION CRITICO

Mirando e situacion critico cu e dos ocupantenan tabata ta den, mesora esnan na e sitio a bati alarma. Varios unidad di polis, tres unidad di ambulance y tambe materialewagen di brandweer a bay na e sitio. Na yegada enberdad nan ta topa cu e chauffeur y e ocupante di e Yaris. Ambos tabata herida, pero e ocupante tabata seriamente herida y tabata pega den e auto. Mesora personal di brandweer a cuminsa na corta e auto pa libera e ocupante kende tabata tin un corta formal na su cabes y tabata grita so di dolor. Despues cu personal di brandweer a logra sake for di den e auto den un situacion basta critico, el a wordo transporta pa hospital. E chauffeur tambe cu tabata herida a wordo transporta cu ambulance pa hospital. Varios unidad di polis a wordo pidi pa cera e crusadanan principal y habri caminda pa asina ambulance por yega cu hopi lihe na Hospital, ya cu tabata teme pa bida di e ocupante.

ADICTO AMBULANTE

Aparentemente e dos ocupantenan di e Yaris ta conocido di polis, e adictonan ambulante Jennirette y Turnbull, Polis no sa di unda nan por a haya e auto aki , y ademas e auto a keda total loss. Polis a tume den beslag pa haci mas investigacion. No ta descarta e posibilidad cu e auto aki ta procedente di ladronicia. E otro personanan envolvi no tabata herida.