ABC: Kier sa ki formula di capacidad di carga ta usando pa hustifica mas crecemento

ORANJESTAD – E cantidad di capacidad existente di hende na Aruba ta bastante asombroso. Asina un publicacion di e fundacion Aruba Birdlife Conservation (ABC) ta sugeri. ABC ta un instancia cu ta bringa e.o. contra mas hotel y sobrepopulacion y hotel na Aruba,  fuera di su meta principal, esta proteccion di pahra y naturalesa di nos isla. Segun e fundacion, siguiendo nan carta habri na conseho di minister y Parlamento di Aruba recientemente, nan a publica un serie di cifra pa presenta nan punto. Segun ABC, esaki mester sirbi como un sosten pa pidi pa haci un estudio mas. 

CIFRAS

Segun ABC, a presenta tres table riba e tema di e industria turistico, capacidad y planes. Aki nan ta mustra e.o. cu e number di capacidad existente ta asombroso. “ Riba un poblacion di 108 mil habitante, suponiendo un total di 26295 camber registra y no registra, Aruba ta buscando un unidad pa cada 4 habitante. Y si nos tuma e grandura di Aruba na 178m2, esaki ta nifica cu tin 148 unidad pa meter cuadra” e entidad no gubernamental ta sigui bisa. 

ESTUDIO DI CAPACIDAD DI CARGA

ABC kier sa ki tipo di estudo di capacidad di carga ta necesario pa conclui cu ainda tin lugar pa mas hotel, y basa riba kico. Nan ta usa un otro table pa mustra cu ainda tin 4 mil unidad cu mester keda construi, di cual algun lo por ta cla pa mercado e aña aki caba. “Usando e formula cu ABC a desaroya basa riba analisis di CBS, di cada 100 empleo crea den e sector turistico, solamente 7% ta ocupa pa hende local.  Den caso di labor di migrante, dentro di 3 pa 5 aña, 3 codependiente lo yega Aruba. Y cu e hecho cu pa cada unidad, ta crea 1,5 empleo, esaki ta conduci na  4239 x 1,5 = 6359 trabo, di cual 93% di 6359 ta 5913 trahado di afo. Ademas cu 5913 trahado mas 7740 codependiente, ta suma 23653 migrante. “Pues e planan di expansion turistico ta indica, segun ABC, den e proximo 8 aña, e poblacion di Aruba lo crece cu 23656 stranhero (imigrantenan di afo)”. Segun ABC, mester splica na hende, ki tipo di formula di capacidad di carga ta usando pa hustifica un crecemento asina.

DENSIDAD DI POBLACION

E fundacion ta sigui bisa cu e densidad di poblacion di Aruba aworaki ta poni na 607 habitante pa meter cuadra y lo aumenta te na 740 habitante pa meter cuadra. Pa e relato completo di ABC, click AKI.