Gobierno evaluando pa demanda tanto RIU como Carlson Group

ORANJESTAD – Gobierno di Aruba ta reuniendo aworaki cu abogadonan aworaki, den evaluacion pa cuminsa un caso contra Carlson Group, doño di Radisson Hotel na Aruba. Den combersacion cu minister di turismo Otmar Oduber, el a confirma na NoticiaCla.com diabierna merdia, cu ‘gobierno no ta nada contento cu e actuacion aki di tanto Carlson Group, como RIU’. Awe mainta mientrastanto Aruba Growth Fund a entama un caso contra Carlson Group, pasobra nan no kier sigui negosha cu e grupo local, siendo cu tur cos ta cla caba pa cumpra e propiedad na Aruba.

MANEHO CONOCI

Segun Oduber, tanto RIU como Carlson Group sa cu tin un maneho, cu a hasta haya sosten den Parlamento unanimamente di 21 parlamentario . Esaki pa bin cu un reglamentacion pa e asunto di all-inclusive. “Y nan tabata sa esaki foi inicio di e benta aki caba”. Como tal aworaki tin reunion aworaki cu e abogadonan di gobierno pa determina si por y lo cuminsa un caso contra Carlson Group pa posiblemente para cualkier benta cu RIU hotel. Mas, Oduber no por a bisa, mirando cu e ta den combersacion ainda cu abogadonan.

AGF TA DEMANDA CARLSON GROUP

Tabata awe mainta den forma di primicia cu NoticiaCla.com a raporta cu e compania Aruba Growth Fund (AGF) a entama un caso awe mainta contra Carlson Group, doñonan di e hotel Radisson Hotel na Aruba, pa incumplimento di e acuerdo di benta. E socio director di AGF, - Rene Kan- , a confirma na NoticiaCla.com awe mainta cu e demanda ta, pa para cualkier intento di Radisson di bende e hotel cu otro cumprado potencial. Investigacion di NoticiaCla.com a revela cu e motibo ta cu e compania doño di e hotel, no kier continua cu e benta na AGF. “Nan no tabatin ningun derecho di bandona e mesa (di negoshacion)” Kan a sigui bisa.

PLACA TA SIGURA

Kan a confirma tambe cu contrario na e informacionnan revela den e matutino Bon Dia Aruba (cu e publica e noticia di e benta di Radisson na RIU) awe mainta, AGF tin e placa sigura y cu tur cos ta cla pa e compra tuma lugar fin di otro luna. Como tal e noticia awe mainta cu Radisson Hotel lo wordo cumpra pa e cadena Spaño RIU, no ta corecto. Mes momento CEO di Aruba Hotel And Tourism Association (AHATA), James Hepple a bisa NoticiaCla.com cu e doño di Radisson na Aruba, esta Carlson Group a duna e grupo AGF te fin di otro luna pa paga e suma completo. “Mientrastanto Carlson Group no ta haci nada”, Hepple a sigui bisa. Esey tin cu nifica cu no ta bay busca of bende cu ningun otro grupo. Si despues di e deadline poni pa Carlson Group, no keda cla, e deal ta cambia of para.