Den corte na Bonaire: Miyones malversa na Bopec

KRALENDIJK – Den transkurso di añanan a malversá miónes di dòler na BOPEC. Esaki abogado Lucas Drissen di bufèt HBN Law & Tax a deklará den Korte. “Mi tin tres aña trahando hopi di aserka ku e curator i mi a konstatá ku a malversá miónes di dòler na BOPEC”, segun e abogado. Ta trata aki di un disputa basta formal entre BOPEC i eks mènedjer general Ethward Manuel. BOPEC a entamá un kaso kontra Manuel i ta eksigí pago di kasi 300 mil dòler. Ethward Manuel apresentá den sala di korte huntu ku su abogado Edward Winkel.

Mester menshoná ku tres aña pasá BOPEC a bai bankarota imientrastantu tin mas ku 80 trahadó wardando riba nan salario. Si tur kos kana segun plan otro luna, pues aprel 2024 ta kuminsá paga e debedónan. Remarkabel ta ku Manuel a kuminsá un proseso pasombra segun e, BOPEC deb’é. BOPEC na su turno a entamá e kaso aki bisando ku Manuel a paga su mes kasi 300 mil dòler di mas na salario. Curator a pone e nòmber di Manuel riba e lista di debedó dudoso.

E DISPUTA

Na 2015 PDVSA a apuntá Manuel komo e mènedjer general. Manuel a splika ku e tabatin un tarea spesífiko di drecha e situashon malu di BOPEC. “Mester a adaptá tur kos segun sistema legal Hulandes i e venezolanonan no tabatin idea kon pa hasié”, segun Manuel. Komo e mènedjer general e tabata instruí e departamento di finansa i rekurso humano. Manuel a duna instrukshon pa paga su salario sin hasi niun retenshon, pues su bruto ta su nèto.

E ta insistí ku esaki ta segun un areglo di expat, sinembargo no tin nada por eskrito tokante esaki. E no ta stipulá den su kontrato laboral tampoko niun kaminda no tin esaki ankrá. Manuel ta bisa ku esaki ta un palabrashon oral ku PDVSA. Abogado Winkel a splika Korte ku ta difísil pa un hende kobra un salario inkorekto pa 5 aña largu sin niun hende nota esaki. Ademas tabatin basta kontrol finansiero i tur aña a entregá un kuenta anual.

MAL MANEHO

Abogado Drissen a enfatisá ku ta bou di mal maneho di Manuel, BOPEC a bai fayit. Na momento ku situashon a bai hopi malu Manuel a laga pone ‘beslag’ riba un kuenta di BOPEC. E abogado ta konvensí ku Manuel a hasi mal uso di su funshon pa enrikesé su mes. E tabata gana mas ku 14 mil dòler pa luna sin retené belasting. Despues e mes a duna instrukshon pa subi su salario na mas ku 23 mil dòler pa luna. P’e abogado e situashon ta klaro. Manuel ta un di e hopi personanan ku a enrikes’é nan mes a kosto di e kompania. E echo ku BOPEC ta un parti chikí di PDVSA a hasi posibel ku añanan largu a malversá plaka. Hues ta tuma un desishon den e kaso aki riba 20 di mart 2024. NOTA: Texto ta scirbi den Papiamento fonetico di Corsou.