Mark Rutte a topa premier di Aruba pa ultimo biaha como Premier Hulandes

ORANJESTAD - Dialuna atardi Prome Minister Evelyn Wever-Croes a reuni cu Premier Hulandes demisionario Mark Rutte riba topiconan relevante pa Aruba.Mester bisa cu esaki ta e ultimo biaha cu Rutte ta topa cu e prome mandatario di Aruba den e calidad di premier ya cu proximamente lo tin un gabinete nobo, y of Rutte lo por cambia di funcion y keda apunta como e ‘hefe’ nobo di NATO. 

TEMANAN COMBERSA 

 Un di e puntonan importante durante e reunion tabata e refinanciemanto di e debe di Covid y e interes halto cu Hulanda a impone riba pais Aruba. Mester bisa cu den pasado caba e prome mandatario Hulandes a bisa Noticiacla cu e no ta interveni personalmente den e cartera di Reino Hulandes, pues no por haci mucho den e caso aki pa e asunto di interes halto pa Aruba. Ademas, prome minister di Aruba mes a recorda cu durante su bishita na Hulanda, ya Prome Minister a reuni caba riba e topico aki cu Secretario di Estado Alexandra van Huffelen, y cu señor Marnix van Rij di Ministerio di Finansas. Ambos, Prome Minister di Aruba a remarca, di ta dispuesto pa yuda caminda cu por. E realidad sinembargo ta, cu Hulanda ta para fuerte cu sin un rijkswet, Hulanda no ta baha e interes halto cu Aruba tin cu paga pa e refinanciamento di e debe. 

Prome Minister a informa Premier Rutte di tur e negociacionnan cu ta andando. Un reunion sumamente importante mirando cu ta Conseho di Minister di Reino mester aproba cualkier palabracion cu wordo haci. Durante e reunion tawata tin hopi interes cerca tur esnan presenta pa scucha di Aruba y su progreso.

"E realidad ta cu Aruba ta bayendo bon, desempleo ta bahando, turismo ta bayendo bon y finansas tambe ta na orden. Lo unico cu falta, ta purba na yega na un miho palabracion pa cu e interes halto cu Aruba a haya di Hulanda riba e debe di Covid. Pa cu esey, mi tin tur confiansa cu nos lo bay yega na un solucion cu ta na miho interes di pais Aruba”, Prome Minister a expresa.