Hoo: Introduccion di Falsidesk na imigracion ta fortifica e control di frontera mas ainda

ORANJESTAD – Como parti di e proceso pa fortifica control di e frontera di Aruba, y tambe conforme e contenido di e Landspakket (proceso cu Hulanda pa drecha cierto maneho di Aruba), e departamento di imigracion di Aruba dialuna a introduci e concepto conoci como ‘Falsidesk’. Segun e director di e departamento di imigracion Andrew Hoo a splica Noticiacla den un combersacion interesante, esaki ta encera cu entre otro Aruba ta haya ayudo di Hulanda den forma di e.o. experticio riba e tereno aki via 6 persona di Koninklijk Marechausee cu ta traha si, bou di immigracion na tanto aeropuerto, wafnan (Barcadera y Oranjestad) y otro puntonan unda cu imigracion ta ubica na Aruba pa controla frontera. Mientras cu a opta pa awe introduci comunidad cu e proceso, esaki ta un sistema cu ta operando 2 aña caba durante cual a bin nota un cambio positivo caba pa loke ta control na frontera di Aruba.  Falsidesk pues ta un parti chikito pero hopi efectivo di e proceso di imigracion pa fortifica e control di frontera den control di legalidad di documentacion di entrada y salida di persona. Ta desaroyando e personal local di imigracion pa haya e conocemento necesario y pa despues nan keda cu e informacion aki tambe. E personal di Hulanda, lo keda Aruba pa duracion di e periodo di protocol entre Hulanda y Aruba, y despues bandona nos isla, lagando e personal local cu tur e informacion y conocemento adkeri. 

FALSIDESK

E falsidesk specificamente ta un oficina ubica na e puntonan di control menciona di imigracion, unda cu ora cu e personal di imigracion awor por detecta documentonan dudoso den un forma mas preciso, sea si ta un paspoort of permiso, of cu e topa un persona considera como dudoso pa loke ta su identidad, y ta pas’e na e oficina special aki, esta e falsidesk, unda cu e documentonan ta wordo gescreened door di e desk aki mas profundo, pa mas control. E personal na e desk aki tin mas expertisio riba e.o. deteccion di documentacion y persona cu identidad falso. E intencion ta pa e Falsidesk controla tur documento interno y externo, cu por determina e legalidad di entrada y of permanencia di e respectivo persona. Por wak e como un tipo di suministrador of coredor di informador (informatiemakelaar), pa otro parternan di control na frontera, manera KPA, DIMAS of otro instancia na Aruba cu tin necesidad di controla documentacion. Cu esaki, segun Hoo, tur departamento na Aruba cu tin cu atende cu documentacion, por beneficia di dje. Cu e Falsidesk, Imigracion ta pone e tono di intercambio di informacion.