Embassy Suites a logra precario pa pone palapa, banda di e beach cu nan a solicita

Posted on 03/1/2024 4:12 pm AST | Updated on 03/1/2024 4:14 pm AST

ORANJESTAD – Despues di basta problema, Embassy Suites Aruba Resort a logra haya su precario pa pone palapa riba beach. Esaki ta un otro 'palabra' pa e permiso pa pone palapa y stul pa nan turistanan por usa e beach respectivo. Segun abogado cu ta representa e hotel, Gwendelyn Croes, a bisa Noticiacla, “E ta (e) mesun precario cu tur otro hotel ta haya”,. Segun Croes, pa pone palapa y beach chairs e mester comparti cu e precario cu a wordo duna eynan den pasado na e Watersport bedrijf cu tin su tent eyriba. 

PROBLEMA

Por corda cu tabatin problema aña pasa ora cu e hotel a cuminsa procesa e area dilanti e hotel den un beach, conforme un palabracion cu lo tabatin. Despues e la haya ordo di Corte pa para e trabounan. E NGO cu tin como meta pa proteha pahra y naturalesa, Aruba Birdlife Conservation a hiba e hotel corte y a gana e caso. Despues a cuminsa un debate interno den gobierno ya cu ta dos diferente partido ta envolvi den otorgacion di cierto permiso. Minister di infrastructura Wever Croes cu ta prome minister tambe, y minister di Naturalesa, Ursell Arends cu ta encarga cu otorgamento di e dispensacion (ontheffing) pa por desaroya un beach eynan. Na final, den e ultimo dianan di Februari (diamars ultimo) e hotel a haya e precario necesario den dia, y mesun anochi a cuminsa ubica e palapanan necesario. 

ABC

Mientras cu ABC a tuma nota di e ultimo desaroyo, nan no ta mucho contento cu esaki y a vocifera esaki tambe. Nan a confirma cu e beach riba cual e hotel a haya e precario, no ta protehi oficialmente como parti di naturalesa, manera cu esun net dilanti ta, cu tin e nomber Juanito Beach. “Juanita Beach ta exactamente banda di e beach cu ABC a proteha. Den e ROPV, Juanita Beach no tin e status di naturalesa, y e status ta ‘beach’, osea strand” e presidente di e fundacion Greg Peterson a bisa Noticiacla. Mientras cu nan a confirma cu e precario ta otorga na Embassy Suites, nan no a mira esaki personalmente pa sa exactamente kico e precario ta ensera. Pero manera cu por lesa mas ariba, segun e abogado, e ta un precario comun manera otro hotelnan ta haya cu tin beach tambe. No ta conoci si ABC lo por y ta bay haci algo awor cu e hotel a haya e precario aki, mirando cu e tereno aki, no ta uno protehi. NOTA: Potretnan cortesia di Aruba Birdlife Conservation. 

 

  • Zulo
  • Postobon
  • Powered by SETAR