Scolnan na Aruba a cuminsa prohibi wega ‘Charlie Charlie'

ORANJESTAD – Un scol na Aruba a prohibi muchanan di hunga e wega “Charlie Charlie Challenge”, sino ‘lo tin consecuencia serio pa e alumno’. E carta di un scol basico (a opta pa blokea e nomber pa motibo etico) ta den poder di NoticiaCla.com, cu ta firma pa e cabesante y ta papia palabra cla. E ta un advertencia na mayornan pa prohibi nan yiunan pa cu e wega. (lesa e carta aki)

PROHIBICION DI WEGA

Segun e cabesante, a tene un ‘apertura’ e siman aki cu e alumnonan y a participa na nan, cu ‘no ta permiti e muchanan pa hunga e wega, of wordo ‘gara’ cu nan a hunga e wega. Segun e cabesante di e scol, hungamento di e wega aki, por tin consecuencia psicologico pa e mucha, crea panico y miedo, y ‘e mucha por te hasta bira malo’. Como tal a dicidi pues pa prohibi e wega na scol. Mes momento ta encurasha e mayor(nan) pa papia cu nan yiunan y prohibi e wega.

MAS SCOL CU CARTA

E website aki a compronde cu tin mas scol cu ta of a manda cartanan similar pa mayor(nan) di alumno(nan) di scolnan basico, splicando nan di e efecto di e wega straño aki.

ORIGEN

E wega tin un origen mexicano y ta wordo compara cu e wega ‘Ouija Board’ cu ta laga hende papia supuestamente cu spirito. E wega ta rekeri un pida papel, dos potlood, y hobennan cu hunga e wega, ta graba esaki cu nan telefon y pone riba social media. E intencion di e wega, ta pa laga bo mes wordo guia pa un demoño mexicano cu yama Charlie.

CON PA HUNGA

Riba e papel ta skibi e palabranan Yes, y No (si y no) bow di otro, y ta pone e dos potloodnan estilo un crus. E siguiente paso ta pa puntra e ‘spirito’ Charlie si e ta presente. Ta puntra e spirito” Charlie Charlie, can we play”, of “Charlie Charlie, are you there”. Esta ta puntra e spirito si e tey y/of si nan por hunga cune. E potlood nan ta suppose di move nan mes, pa sea e palabra yes, of no, (si of no), y asina e wega ta continua. Unabes cumpli, ta benta e potlood nan abou y ta bisa Charlie “Goodbye” osea Ayo.

MISTERIO

E forma con e potlood nan ta move, of si ta berdad cu nan ta move nan so, ta keda un misterio. Hopi ta pensa cu ta e muchanan mes pa nan movecion inconciente, ta pone cu e potlood nan ta move. Hecho ta cu, e ta creando un cos den e muchanan cu no ta saludabel segun informacion cu NoticiaCla.com a compila. Como tal mayornan a cuminsa spanta, y scolnan a cuminsa manda carta pa e mayornan splica nan yiunan di e peliger di e weganan aki, cu tin hopi parecido na e mesun tipo di wega misterioso, Ouija Board, cu tabata supuestamente laga bo papia cu spirito di hende.