Oduber: Tin espacio pa aumento tarifa autobus

ORANJESTAD – Tin espacio pa aumento di tarifa di bus. Esaki e mandatario di transporte Otmar Oduber bisa diahuebs ora cu e la atende cu un grupo di chauffeurnan di autobus.E punto di e prijs cual ta hopi aña no a wordo adapta, a haya su atencion. Segun e mandatario, e ta mira posibel pa bin cu un aumento di prijs. E chauffeurnan a presenta tur e calculacionnan cu a wordo haci y awor tin un comision cu ta bai traha den e proximo 10 dia riba esaki pa despues por bolbe na mesa hunto y mira con lo por ‘faseer’ e aumento aki. 

AUMENTO HUSTIFICA

E mandatario ta bisa cu e aumento aki ta na su lugar mirando cu 7 aña pasa tabata e ultimo biaha cu a adapta e tarifanan y si mira aumento di costo di bida ademas cu prome cu esey no a adapta e tarifanan pa casi 20 aña, “mi ta kere cu ta mas cu na su lugar, tin espacio pa aumento y e aumento aki mester mira con nos ta faseer e den e proximo añanan pa logra yega na un tarifa cu ta husto y socialmente posibel pa e chauffeurnan di autobus por tin un entrada pa nan famia por biba di dje”.

PARADA DI BUS

A haci palabracion cu e aspecto di e parada di busnan tanto na San Nicolas como Playa, lo haya atencion debido, manera cu esun di Noord ta hayando caba. cu lo bai wordo ubica dilanti misa di Playa. Tambe a pidi pa afdak y baño pa asina nan por tin un caminda cu nan por bai rust.