Fazio: Aruba Happy flow a pone aeropuerto riba mapa

ORANJESTAD - Un proyecto piloto unico y inovativo a wordo lanza awe na Aeropuerto di Aruba: Aruba Happy Flow. E ta un proceso di pasahero inovativo unda e pasahero ta wordo rekeri pa mustra su paspoort solamente un biaha durante e proceso na aeropuerto. E lanzamento oficial a wordo haci pa prome minister   Mike Eman. E ultimo di un serie di orado, James Fazio a porta describi e impacto di e proyecto miho. “E la pone aeropuerto di Aruba riba mapa”. Wak e video di demonstracion aki. 

IMPRESION

E proyecto su impacto y importancia por a wordo midi tambe pa e lista impresionante di bishitante local pero mas ainda di afo. Varios di nan, apenas algun ora na Aruba (despues di un biahe di 9 ora) manera presidente & CEO di Schiphol Group Jos Nijhuis, Senior Vice President di KLM Security Services Ben Swagerman, y Senior VP di Vision-Box Miguel Leitmann. Y nan palabranan di elogio, tabata indica cu si tabatin cualkier duda, Aruba a prueba tur hende robes awe. Y esun cu a haya tur e elogio awe, tabata prome minister Mike Eman. “Bo terkesa y determinacion a pone cu awe e proyecto ta operacional”, Nijhuis di Schiphol, a sigura e prome mandatario di Aruba.

HAPPY FLOW

Pa loke ta e proyecto mes, e ta algo cu no tin niun caminda na mundo. Y su meta ta pa facilita e pasahero, yega mas lihe na e ‘porta di salida’, y manera gerente di operacion di aeropuerto, Jürge Benschop a bisa, ‘duna e pasahero mas tempo pa shop’. E uso di reconocimento facial ta permiti pa e pasahero por sigui pa check-in, drop off su maletanan, pasa imigracion y aborda avion, tur sin mester wordo pidi pa mustra su boarding pass atrobe.

Pa por haci esaki, Aruba Happy Flow ta combina e proceso di control di imigracion hunto cu e proceso priva di e pasahero na aeropuerto. Esaki ta unico na mundo y a wordo disenja pa facilita e proceso di pasahero, haciendo e liher y sigur.

ESFUERSO

E lista impresionante di bishitante diahuebs, tabata muestra cu Aruba Happy Flow ta e resultado di un esfuerzo cooperativo door di no solamente Aruba, sino Hulanda, Aeropuerto di Aruba, Schiphol Group y KLM. Despues di e procedura di tender, Vision-Box a keda encarga cu e implementacion di e Proyecto.

EMAN

Prome Minister di Aruba Mike Eman ta bisa: "Happy Flow ta un paso sumamente inovativo y importante den e industria di transportacion di pasahero, no solamente pa Aruba, sino mundialmente. Aruba ta hopi orguyoso di lanza e concepto unico aki door di trece e partidonan publico y priva hunto. Eman no a perde tempo pa tambe mustra cu Happy Flow ta un otro logro pa crea un economia di conocimento sostenibel na Aruba y fortalesiendo e desaroyo di Aruba como un hub. “Mi ta hopi satisfecho cu e prome fase di resultadonan concreto di e partnership cu a wordo forma riba iniciativa di Aruba cu Gobierno Hulandes, KLM y Schiphol pa haci e proyecto aki posibel aportando na e ambicion di Aruba pa logra Pre Clearance Europeo." Eman a bisa, indicando cu esey ta su siguiente ‘baby’ na caminda.

NIJHUIS

“Cu Aruba Happy Flow, hunto nos a haci un paso inovativo pa sigui mehora e comfortabilidad pa e pasaheronan. Esaki ta un proyecto unico unda entre otro e proceso di pasahero priva y publico ta wordo combina. Mi espectativanan ta halto pa e resultadonan. Si e experiencia y resultadonan di e testnan ta positivo, nos lo sigui desaroya e proyecto aki,” segun Jos Nijhuis di Schiphol

KLM

Un di e otro grandinan di aviacion, representando e aerolinea blauw hulandes, esta Ben Swagerman: “KLM ta para semper fuerte pa posibilidadnan pa sigui mehora e conveniencia pa su pasaheronan. Ta pesei nos ta contento di por contribui na e proyecto inovativo aki, cu lo simplifica y acelera e proceso completo for di check-in te momento di aborda avion mirando cu pasaheronan lo mester mustra nan documentonan solamente un biaha.”

FAZIO

“Como aeropuerto nacional di e isla felis, nos ta orguyoso pa introduci Aruba Happy Flow. E proyecto aki ta demostra nos compromiso pa mehora e experiencia di e pasahero, y pa introduci solucionnan tecnologico nobo y inovativo pa yega e crecemento den futuro di trafico di pasahero y pa mantene e nivelnan mas halto di safety y security. E proyecto aki ta un ehempel extraordinario di con e sector publico y priva por traha hunto pa logra hopi. Loke a wordo logra awe lo ricibi atencion di aeropuertonan rond mundo, obstante tamaño, nos tur ta comparti varios di e mesun problemanan, y awe, nos ta lidera e caminda den un solucion inovativo pa mehora e experiencia na aeropuerto,” asina CEO di AAA James Fazio a bisa. “Aruba Happy Flows awe a pone aeropuerto di Aruba riba mapa”.

VISION BOX

“Nos ta marcando historia na Aruba awe, dunando inicio na un era nobo den e sector di aviacion. Happy Flow ta e prome proceso di pasahero 100% self-service basa riba e uso di biometrics pa brinda un experiencia sigur, lihe y contento pa e pasaheronan. Ademas e ta brinda e autoridadnan un plataforma “end-to-end” cu ta permiti pa monitor e proceso di pasahero completo cu beneficio di seguridad, eficiencia y entrada, respetando e privacidad di informacion na tur tempo,” asina Senior VP di Vision Box Miguel Leitmann a bisa.

PRUEBA TEMPORAL

E proyecto piloto Aruba Happy Flow lo opera na Aeropuerto di Aruba pa 2 aña. Na prome instante solamente un grupo limita di pasaheronan di KLM biahando cu paspoort Europeo lo wordo invita pa participa den e proyecto piloto. Nan lo wordo invita pa participa na e proceso di salida na Aeropuerto di Aruba.

EXPANSION

Si e resultadonan di e proyecto piloto ta positivo, expansion di e proyecto pa inclui gruponan mas grandi di pasahero ta posibel. Posibilidadnan adicional ta inclui integracion cu e proceso di seguridad, of e introduccion di e proceso di Happy Flow na Schiphol na Amsterdam.