Na Corsou conocido cantante Amos Balentin a recobra su libertad temporal atrobe

Na Corsou conocido cantante Amos Balentin a recobra su libertad temporal atrobe

Posted on 02/27/2024 10:37 am AST | Updated on 02/27/2024 10:37 am AST

WILLEMSTAD.- Manera Extra a relatá ayera, e konosido kantante  kompositor i tumbero Amos ‘Amorreus’ Balentin (43) mester a presentá dilanti di wes komisario huntu ku su abogado Athena Sulvaran, pa wak si lo prolongá su detenshon ku 8 dia mas, òf ku e por bai kas pendiente investigashon. Despues di a evaluá e kaso, wes komisario i fiskal a bai di akuerdo pa suspendé detenshon di Balentin bou di vários kondishon. Entre otro ku e ta pone su mes disponibel pa hustisia, e ta keda prohibí pa komuniká ku e dama, e ta keda prohibí pa bai na adrès di e dama i e tin ku traha reportahenan di su sirkunstansianan. Pa mantené un sospechoso será, mester tin echonan (Feiten) fuerte òf grave pero den e kaso di Balentin esei no tabata e kaso. Hopi bia den tipo di kasonan asin’aki, sea e ta keda seponé òf  ta keda tratá den e loke ta keda yamá “Hura zitting “ kaminda e sospechoso no ta bin korte. Manera ya a bira konosí, djabièrnè den oranan di mainta, Balentin mester a presentá na warda di polis, despues ku a hasi denunsia di maltrato relashonal i menasa kontra di dje. Despues di interogashon personal di reshèrshi di VVC a detené Balentin. Su detenshon a tuma lugá na warda di reshèrshi. A presentá e sospechoso dilanti un fiskal ouksiliar ku a ordená su enkarselamentu pendiente di mas investigashon.

Hustisia no ta tolerá niun akto di maltrato ni menasa. Durante tur kaso di maltrato i òf  menasa den sala di korte sea ta relashonal òf kualke otro situashon korte ta enfatisá ku ta inakseptabel pa maltratá otro. Esaki no ta keda tolerá i si e víktima hasi denunsia, e sospechoso lo keda detené inmediatamente sea e ta hende muhé òf hende hòmber  i kon chikí ku e kaso ta. Si e víktima a keda seriamente lástima òf tin kualke daño ku el a haña na kualke parti di su kurpa, e sospechoso lo keda detené mas largu i lo tin di duna kuenta i rason den korte. NOTA: Texto ta scirbi den Papiamento fonetico di Corsou. 

  • Powered by SETAR