ORANJESTAD - Dialuna mainta, durante un conferencia di prensa di Gobierno di Aruba, Minister di Husticia y Asuntonan Social Sr. Rocco Tjon, a anuncia e lansamento di campaña nobo di conscientisacion pa siguridad den trafico. Esaki lo cuminsa entrante prome di Maart.
E meta principal di e campaña ta pa mehora siguridad riba caminda, reduci accidentenan y salba bida. Durante e campaña lo enfoca riba educacion y conscientisacion tocante e factornan di peligernan mas comun manera; core bou influencia di alcohol, core cu velocidad halto, distraccion den auto, uzo di seat belt y child seat. Tambe, lo educa riba interseccionnan den trafico, cu pa hopi hende ta trece confusion y por causa accident. Lo bay usa diferente plataforma di media pa divulga informacion vital na comunidad.
Durante e campaña aki lo lansa e website www.traficosigur.aw, un hub centralisa y diseña pa brinda comunidad recursonan importante pa mehora siguridad den trafico. E website lo tin contenido educacional cu lo cubri un variedad di topico pa tur usuarionan di trafico. Topiconan manera peligernan di trafico actual, tips pa preveni accidente, reglanan y leynan di trafico, con pa core of anda riba caretera nan nobo manera Watty Vos Boulevard y Green Corridor y hopi mas. E Website tambe lo tin un sesion interactivo di Pregunta y Contesta (Q&A) cu ta dirigi na contesta preguntanan mas comun y preocupacionnan di comunidad.
Mayoria di e accidentenan cu ta sosodiendo den e ultimo añanan a base di factornan cu ta pone nos mes y otronan na peliger, cual facilmente por wordo evita. Na final di aña 2022 a registra 7,341 incidente riba caminda di cual 13,069 persona tabata envolvi y 75% di e accidente nan aki a wordo causa pa falta di atencion of distraccion riba caminda.
Parti di e campaña ta bay encera tambe un encuensta pa brinda mas participacion integral di comunidad caminda tur usuario di trafico, sea manehadonan di auto, ciclista, motociclista y peaton por comparti nan preocupacionnan, nan opinion y sugerencia. E enfoke inclusivo aki ta sigura cu e strategianan di e campaña ta adapta pa atende e necesidadnan specifico y retonan cu nos comunidad ta enfrenta.
E iniciativa aki ta resultado di colaboracion di diferente stakeholders den e veld hudicial cu ta bay promove un cultura di siguridad den trafico. Comision Trafico Sigur ta curasha cada ciudadano pa forma parti di e iniciativa aki por medio di haci uzo di e website www.traficosigur.aw y educa su mes cu informacionnan oficial di trafico. Por haci pregunta y comparti opinion y preocupacion via e website of yenando e encuesta. Pues, ta pidi nos comunidad pa keda pendiente pa e informacionan cu pronto lo keda publica tocante di e lansamento di e Website.
ORANJESTAD – Minister di finanza demisionario Xiomara Maduro a contesta presidente di Parlamento Gerlien Croes dialuna, cu no mester tin ningun excuse pa trata e presupuesto 2025. E la reacciona despues cu siman pasa Croes a indica cu ta wardando riba Gobierno, pa por trata e presupuesto pasobra Gobierno ainda falta pa manda cierto documetonan. For di e contesta di Maduro por compronde cu Gobierno a manda tur cos caba. “Desde siman pasa e contestanan di Gobierno tambe a bay pa Parlamento, pues Presidente di Parlamento tin tur informacion pa asina por yama e reunion publico pa atende cu Presupuesto 2025” Maduro a bisa den un reaccion publico.
ORANJESTAD – “Nos a tuma nota tambe di menasa nan contra di Cuerpo Policial, y esaki sigur no lo ser tolera” tabata parti di un reaccion dialuna di minister demisionario di husticia Rocco Tjon na Noticiacla riba e caso lamentable di fin di siman unda cu un polis a tira un persona mata durante un persecucion. “ Na prome lugar kier manda palabranan di condolencia y forsa na famia di e fayecido”: e mandatario a cuminsa na bisa Noticiacla.
ORANJESTAD – Dialuna mainta a habri cu un confrontacion entre lider di fraccion di partido PPA Otmar Oduber y e presidente di Parlamento Gerlien Croes. Ora cu Oduber tabata hiba su disertacion durante tratamento di presupuesto di Algemene Rekenkamer van Aruba (ARA), e presidente a hala atencion di Oduber mirando cu e lo tabata desviando di e tema y a bay riba e aumento di botter di gas. Aki Oduber a irita y a mustra Croes cu e no por interumpie den un disertacion. Ademas a referi na e hecho cu Croes awor ta forma parti di e siguiente gobierno, cu ta culpable pa e aumento aproba. Esaki pasobra ta e minister actual Geoffrey Wever, cu lo forma parti di e proximo gobierno, ta responsabel pa e aumento. A keda un bay bin chikito entre e dos personanan aki awe mainta. Remarcable ta cu e segmento di e video aki ta poni riba e propio pagina di facebook di Parlamento di Aruba.
ORANJESTAD – Partidonan AVP y FUTURO a yega na un base di acuerdo pa traha hunto. Esaki ta e mensahe principal cu e formadornan Mike Eman y Gerlien Croes a informa Gobernador di Aruba SE Alfonso Boekhoudt diabierna mainta. Esaki ta confirma e noticia di ayera di noticiacla, cu a raporta cu tabatin huma blanco, usando e referencia na ora cu scohe un pontifice nobo, cu ta nifica den e caso aki cu partidonan realmente a haya otro pa traha cu otro. Ademas di loke a keda declara, a confirma cu lo bay forma un gobierno cu 7 minister, di cual 5 ta bay pa AVP y 2 pa FUTURO. Ken ta bira kico, ainda no ta conoci y awor lo traha riba esey. A mustra tambe riba e proceso nobo di screening, cu ta pone cu lo tuma mas tempo awor pa esaki keda cla y a pidi pa tene cuenta cu esaki. E proximo encuentro cu gobernador lo ta dia 18 di februari 2025 proximo, y e momento ey por duna un miho bista cuanto tempo mas lo dura prome cu por bisa miho pa ki tempo por papia di huramentacion di e gabinete nobo.
ORANJESTAD – Tin huma blanco pa loke ta e proceso di formacion di un gobierno nobo. Noticiacla a compronde cu inoficialmente e partidonan AVP y FUTURO a haya otro y ta cla pa formalisa nan acuerdo e siman aki. Inoficialmente pasobra e ta bira oficial te ora cu e keda presenta na Gobernador di Aruba, SE Alfonso Boekhoudt cu por sosode mayan diabierna despues cu e dos formadornan topa cu Gobernador. E detayes completo no ta conoci, pero loke si por bisa ta cu despues di un bay bin henter e siman aki, partidonan a keda cla si, y awor mester anuncia e lista oficial di cartera di minister, pero mas importante, e detaye di e programa di gobernacion di e gabinete. E no tabata un proceso facil, Noticiacla a compronde, pero, awor si ta cla y lo tin un gabinete nobo. Tin varios lista cu ta circula di e carteranan y ken lo bira e respectivo ministernan pa e respectivo partidonan.
DEN HAAG / ORANJESTAD – Prome Minister Evelyn Wever -Croes dciahuebs 6 di februari, a reuni y na e mesun momento cera conoci cu Minister President di Hulanda, señor Dick Schoof. Durante e reunion a trata diferente punto di interes, pero e prome punto cu e Premier Hulandes tawatin riba su agenda a trata e maneho financiero responsabel di pais Aruba. Riba esaki Prome Minister di Aruba a duna e mandatario Hulandes un relato detaya di tur e trabounan cu a haci y ta haciendo pa Aruba ta financieramente stabiel na e momento aki.