Segun premier Wever- Croes: Hotel Secrets lo habri fin di 2024

ORANJESTAD -- Minister President Evelyn Wever-Croes a reuni cu desaroyadornan di hotel Secrets na San Nicolas. Segun e prome mandatario, desaroyadornan tabata tin e bon noticia cu nan ta trahando pa keda cla cu e prome fase di e hotel pa fin di e aña aki, 2024. E comunicado no ta bisa nada si di e situacion legal cu e hotel a confronta y con ta para cu e parti aki. Ta conoci cu ciudadanonan den cercania di e hotel tabatin problema pa cu e construccion aki y cu a protesta den corte causando tardansa pa e hotel. Ta keda pendiente awo pa noticiacla pa tende con a para cu e parti aki. 

E informacion di e desaroyadornan, pa premier Wever Croes ta un noticia hopi positivo pa San Nicolas y pa Aruba segun e mandatariop. E hotel aki lo ta e prome hotel grandi pa San Nicolas y cu lo genera un desaroyo grandi pa San Nicolas y pa esnan cu ta biba pariba di burg. “Esey tabata nos compromiso cu San Nicolas, pa trece bida bek den San Nicolas, y nos ta logrando”, Minister President Evelyn Wever-Croes a accentua. 

UN ERA NOBO PA SAN NICOLAS

Pa Gabinete Wever-Croes II,  desaroyo di San Nicolas ta un prioridad y p’esey ta traha duro pa logra yega na un solucion pa cu e proyecto aki. Prome Minister a indica cu pa Gobierno e proyecto aki ta uno di gran beneficio mirando cu e lo crea oportunidad laboral y un crecemento economico pa Aruba na San Nicolas y vecindario. Tambe, Gobierno ta invertiendo hopi placa den embeyecemento di diferente area incluyendo Baby Beach y Rodgers Beach. 

Un otro desaroyo importante pa San Nicolas ta e World War II Memorial cu lo ta na Seroe Colorado y cu lo atrae hopi bishitante pa e parti aki di nos isla, combina cu un bishita den centro di San Nicolas. E proyecto aki lo keda cla na mita di e aña aki. 

Tambe tin e trabounan den Mainstreet San Nicolas, cu lo cuminsa e prome kwartaal di 2024. Y e esfuersonan cu ministernan di Economia y Naturalesa ta haciendo pa trece un desaroyo den centro di San Nicolas. Tur esakinan ta un muestra di e compromiso cu Gobierno tin cu Aruba y principalmente cu e habitantenan di San Nicolas.