Croes: Compania di petroleo a identifica 3 posibel campo di gas rond di Aruba

ORANJESTAD – E compania di petroleo Armstrong International recientemente a informa cu nan a identifica 3 campo di gas, parti nor-este di Aruba. Asina gobierno di Aruba a informa oficialmente diahuebs atardi. Mester bisa si cu e noticia sinembargo a plama algun dia pasa caba pa e portal 24ora.com di forma inoficial. 

Gobierno di Aruba a recorda diahuebs cu aña pasa nan a anuncia di a wordo acerca pa Armstrong International, un compania Americano renombra di petroleo, cu e peticion pa por explora e posibilidad di gas y petroleo den awanan teritorial di Aruba, riba gasto di e compania. Segun nan propio investigacionnan, e posibilidad ta hopi grandi.

Armstrong International ta un subsidiario di Armstrong Oil and Gas, basa na Denver, Colorado. Armstrong O&G ta un compania independiente cu un historia exitoso y experiencia substancial den exploracion pa hidrocarburos na Merca, incluyendo algun campo di petroleo gigante na Alaska. Esun mas recien ta e campo Pikka cu mas cu 2.5 biyon bari na e North Slope di Alaska. Pikka ta un di e descubrimentonan mas grandi na Merca den e ultimo decada.

Gobierno di Aruba mediante su compania estatal Compania Arubano di Petroleo a firma un MOU y e fase inicial di investigacion y estudio a inicia utilisando tur e datonan geologico y geofisico disponibel. E estudio lo inclui un interpretacion di e datos sismico existente.

Awe nos por anuncia cu Armstrong International a identifica 3 campo di gas, parti nor-este di Aruba.

Awor cu e camponan a wordo identifica, lo continua cu proceso di aprobacion den Gobierno di Aruba, pa esaki por wordo concretisa lo antes posibel. Una bes e proceso di aprobacion di parti di Gobierno di Aruba keda finalisa, Compania di Petroleo Arubano lo invita Armstrong International pa bin Aruba pa por firma e acuerdo di exploracion.

Minister Glenbert Croes a declara: “Esaki ta un noticia hopi grandi pa nos Pais, un noticia cu lo cambia bida di nos yiunan, nan yiunan y generacionnan cu ta sigui.”