ORANJESTAD - Diabierna awor lo tuma lugar un caso den corte caminda cu e fundacion Ducapro pa medio di su abogado David Kock ta demanda e radio emisora 100.9-Hits100FM (Q-waves N.V) pa stop di toca musica den aire cu ta proteha pa e organisacion di proteccion di derechonan di autor Buma/Stemra. E caso aki lo tuma lugar diabierna awor pa 10:30 di mainta y e lo ta un kortgeding.
Hits100FM a sigura publicamente cu mescos cu tur otro radio emisora comercial na Aruba ta toca musica local y internacional ya pa alrededor di 70 aña caba. “Nunca antes e radio emisoranan a wordo cobra pa derechonan di autor pa motibo cu organisacionnan di derecho no tabata considera e islanan chikito aki manera Aruba, Corsow, Boneiro y otronan, como mercadonan di interes pa motibo di nan tamaño y nan economia hopi limita” e emisora ta bisa den un comunicado. Abogado Gabriela Sjiem Fat lo defende 100.9-Hits100FM den e caso interesante aki mayan mainta. Director di 100.9-Hits100FM Sr. Aldrich Croes mientrastanto a declara cu nan no ta contra pa paga pa derechonan sinembargo e mester ta na un tarifa husto y teniendo na consideracion tur e factornan cu ta causa un impacto negativo riba e bienestar di radio emisoranan na Aruba.
DUCAPRO
Abogado pa Ducapro David Kock a confirma e caso cu nan a cuminsa, pero no kier a duna mas comentario riba e caso aki. E la confirma si cu tur otro radio emisora a haya un carta asina pero cu esaki ta e prome caso sumario.
ORANJESTAD – Un dia despues di a bishita Aruba, e barco crucero Rotterdam di Holland America Line, a raporta un brote di malesa gastrointestinal riba su nabegacion actual cu mas cu 100 pasahero malu abordo. Di acuerdo cu e Centronan pa Control y Prevencion di Malesa (CDC), Rotterdam di Holland America Line tin 107 invitado malo abordo di su biahe actual cu a sali dia 2 di februari 2025. Segun informe, 12 miembro di tripulacion tambe ta malo.
BOGOTA – Un grupo di ciudadano Colombiano a keda deteni pa agentenan di imigracion.Esaki segun e portal pluralidadz.com. Segun e relato, no ta specifica mucho si di ki tempo esaki a sosode ni cu cuanto hende. Solamente cu un grupo di agente di biahe Colombiano a raporta di ta victima di trato inhusto y arbitrario di autoridadnan di inmigracion di Aruba. Loke ta hala atencion, ta cu e accion aki a logra hala atencion di medionan Colombiano, poniendo un tinte negativo riba nos servicio di imigracion.
ORANJESTAD - Diaranson 13 di Februari 2025, Wikipedia riba Aruba lo lansa oficialmente cu un evento di apertura na Biblioteca Nacional Aruba. E proyecto aki, cu ta dura 18 luna, tin como meta pa educa e comunidad local riba e poder di Wikipedia, forma un comunidad activo pa comparti conocemento, y mustra e herencia rico di Aruba riba un plataforma global.