- Doño di Tesla, Elon Musk por gana un bonus di 1 biyon dollar
- Colaboracion pa aumenta exito di estudio pa studiantenan Caribense ta haya continuacion
- Ajax a despedi entrenador su John Heitinga despues di mal cuminsamento di temporada
- Minister Croes a firma acuerdo na Bonaire pa Vierlanden Overleg Enseñansa y Cultura
- Gobierno di Aruba a emiti conseho di biahe negativo pa Venezuela y Haiti
A rindi honor na tur ex-director di Aruba Tourism Bureau y Aruba Tourism Authority
ORANJESTAD - Durante un atardi bunita y cu presencia di Minister di Turismo y Salubridad Publico, Danguillaume Oduber y CEO di A.T.A., Ronella Croes, Aruba Tourism Authority, a percura pa honra algun gran baluarte di nos turismo y ex-directornan di Aruba Tourism Bureau y Aruba Tourism Authority. A honra ex-directornan personalmente, den un caso a conta cu famia cu a representa un ex-director pa motibo di salud, y den otro caso famia cu a representa un ex-director cu a bai laga nos (q.e.p.d.). Alabes a obsekia e pintor original di e pintura, Gustave Nouel, cu su propio cuadra.
Den decada 20, economía di Aruba tabata conta cu un pilar economico dependiente di Refineria Lago. Despues di Guera Mundial II, despues cu turismo y biahe a cuminsa bira mas popular, a cuminsa mira e posibilidad pa explora e sector di turismo na Aruba. Cu establecimiento di Aruba Tourist Commission, consistiendo di diferente comerciante local, a percura pa un plan pa expansion di infrastructura pa por acomoda e necesidad di e bishitante.
Den cara di adversidad, Aruba a cambia su enfoke pa turismo, resultando den desaroyonan y proyectonan importante. E paisahe rico di e isla hunto cu acomodacion di primera clase, y Aruba su hospitalidad, a haci Aruba un di e destinacionnan mas atractivo pa un experiencia inigualabel.
Na aña 1953 Aruba Tourist Commission a cambia di maneho y a sigui bou di nomber di Aruba Tourism Bureau. Aki ta caminda cu a conoce gran baluartenan den historia di e industria di turismo caminda cu Aruba por a conta cu un sector turístico evoluciona, caminda a percura pa reforsa economía local y fomenta intercambio cultural.
Aruba Tourism Bureau a conta cu un temporada entre aña 1953 te cu 1985, danki na maneho di directornan Michael Kuiperi, sigui pa Odulio Bertrando ‘Beti’ Arends y finalmente Roderick ‘Rory’ Arends. Na aña 1985, Aruba Tourism Bureau a hiba un transformacion y a bira Aruba Tourism Authority, bou di guia di Remigio Wever, Jan van Nes y Myrna Jansen-Feliciano, kendenan a percura pa un maneho di turismo duradero durante temporada stabiel y durante temporada di desafio.
Ta danki na e esfuerso colectivo di cada director y nan respectivo ekipo y socionan, cu awe Aruba por conta cu un turismo solido! Mescos cu ora di construi un cas, semper ta cuminsa cu e fundeshi. Y awe por bisa, cu ta obvio pa tur hende, cu turismo di Aruba ta ancra riba un bon fundeshi, solido basha. Consecuentemente e cas riba dje tambe ta fuerte, capaz pa surpasa tempo di solo, di awasero y di biento di cuaresma. Awendia ta un cuestion di simplemente sigui fortalece e cas y traha riba e hogar.
E ex-directornan a pasa den diferente etapa di nos historia turistico, di cual nan tabata e autor. “Y no kere, awe ainda nos ta tira bista regularmente riba e modelo cu nan a hinca den otro, basa riba experiencia. Mientras cu den e caranan aki mi ta mira con ora Lago a cera, nan a bay mesa y transforma e economia di e pais aki den turismo…mi ta mira tambe con nan a pasa door di etapa manera 9/11, caida economico, etc. Y kere mi, si no tabata pa e fundeshi cu nan a traha durante e ultimo decadanan aki, nos tampoco lo no por a maneha temponan di reto manera e pandemia. Cu hopi esfuerso, trabou duro y uzando nan enseñansa, awe mi por bisa cu nos a sali mas cu exitosamente di e pandemia, den un forma excepcional den henter e region Caribense”, asina Ronella Croes a bisa cu un bos di satisfaccion y orguyo.
Reconociendo tur cu a hunga un papel clave den turismo, ta cu placer A.T.A. hunto cu Ministerio di Turismo a anuncia cu nan lo expande e monumento Ike Cohen cu ta situa na Plaza Turismo. E monumento ta dunahonor actualmente na 17 persona clave den turismo. Lo expand’e pa honra mas cu 50 otro persona, incluyendo tur ex-director di Turismo di Aruba .. pues tur presente.
Desde januari 2011, Aruba Tourism Authority ta conocí como un entidad independiente ‘Sui Generis’, bou di maneho di e CEO, Ronella Croes, kende ta cumpli cu e promesa pa un turismo solido.
Avion di JetBlue di Boston pa Aruba a cambia rumbo pa emergencia medico
BOSTON - Un avion di JetBlue cu tabata biaha for di Boston pa Aruba — a cambia rumbo ayera 4 di november pa Bermuda pa motibo di un emergencia medico bordo cu un pasahero. No ta conoci ki emergencia e tabata. E avion tipo Airbus A321 a sali despues riba su ruta original pa Aeropuerto Internacional Reina Beatrix den Aruba, despues di e desviacion temporario.
Estudio climatologico di NCRC: Si no haci nada, Aruba lo enfrenta un cambio drastico
ORANJESTAD — Stimson Center (un instituto di investigacion Mericano), hunto cu e Conseho Nacional pa Resiliencia di Clima (NCRC), a publica e siman aki e resultadonan di un estudio (yama CORVI) tocante riesgonan di clima y lama pa Aruba. E investigacion a wordo patrocina door di Gobierno di Aruba, Aruba Hotel & Tourism Association (AHATA), Aruba Bank, Aruba Tourism Authority (ATA), Aruba Airport Authority (AAA), Banco Central di Aruba (CBA), Metacorp, SETAR, WEB y Utilities NV E estudio CORVI aki ta splica e impactonan grandi di cambio di clima na Aruba. Si nos no haci nada, Aruba lo enfrenta un cambio drastico. Nivel di lama ta subi, lo tin mas calor y secura pa mas largo, y nos costanan ta gastando. Esaki ta un peliger pa casi tur cos na Aruba: nos casnan, cuido medico, turismo, economia y infrastructura.
Premier Mike Eman ta invitado di Noticiacla LIVE awe diamars!
ORANJESTAD – Premier Mike Eman ta invitado di Noticiacla LIVE awe diamars anochi. Pa un motibo fuera di alcanse, e programa pa siman pasa diahuebs nochi cu invitado Prome Minister Mike Eman, no a sigui mas sino a bay pa awe diamars 4 di November 2025, mesun ora esta 8:30pm. Durante e programa, e moderador Tito Laclé lo haci varios pregunta riba e tema di e.o. HOFA, pa haya clarificacion riba e tema actual. E programa ta pasa riba e pagina di Facebook di Noticiacla 2.0. y despues riba e pagina di youtube di Noticiacla. No perde!
E posible proximo prome minister di Hulanda, tabata invitado di Noticiacla LIVE
ORANJESTAD – Si tur cos cana manera e ta premira di lo cana, lider di partido hulandes D66 sr Rob Jetten, lo ta e proximo prome minister di Hulanda. Tabata na mei di 2023 cu e persona cu posiblemente ta bira e proximo minister presidente di Aruba, tabata un invitado den e programa Noticiacla LIVE esta Rob Jetten. E tabata minister di clima y energia e e tempo ey, y tabata presente pa un congreso di medio ambiente na Aruba. Esey tabata e prome contacto cu nos tabatin cu sr Jetten en tempo ey. Si tur cos cana bon, sr Jetten lo bira e proximo prome minister di Hulanda, liderando partido D66. Pa wak e fragmento, riba pakico no a habri e conferencia pa publico e tempo ey, click AKI. Ademas sr Jetten ta papia di ta conciente pakico e tema di clima no tabata mucho interesante pa hendenan local na Aruba e tempo ey. Pa e fragmento ey, click AKI. Y e video inicial cortico, sr Jetten ta bisa cu e ta stima e islanan!.
Ora bo pidi ‘poco awa cay’, cuidou loke bo ta desea, pa despues no lamenta!
ORANJESTAD – No pidi pa algo, si bo no sa e consecuencia, pasobra despues bo lo lamenta. No ta awor sino masha tempo, cu ciudadanonan (varios) ta pidi pa yobida pa Aruba. Algo normal y comprendibel, ya cu yobida ta percura pa mehoracion di nos flora y ta haci nos tera berde. Sigur ora cu nos tin hopi tempo sin haya un yobida, cu ta crea secura. E problema ta, cu hende ta pidi cos sin sa, of ta keha semper, den bon y malo. Entre otro, ora cu hende tende cu tin mal tempo na caminda, nan ta practicamente reza pidi, of te hasta sclama, pa e pasa riba Aruba, ‘pasobra nos mester poco awacero’. E problema ta cu ora cu e ‘mal tempo’ aki yega, y pasa riba Aruba, e daño cu e ta of por haci, ta pone cu despues, bo isla ta keda ‘na werki’. Y esaki ta sosode hopi biaha tambe ora cu tormenta tropicalnan tin Aruba riba nan caminda. ‘Mare e por pasa pa asina nos haya poco awa’. Si nos raporta cu e tempo ta na caminda, e critica ta ‘ay no, boso a spanta e tempo caba y e la bay’, of ‘keda keto, laga e cos pasa pa nos haya awa’. Y si nos no bisa nada, nos ta haya zundra:’ Bo no por a avisa nos sikiera? Ata nos yen di problema awo’. Pues nunca no ta bon. Enfin. Nos a custumbra.
Premier Mike Eman ta invitado di Noticiacla LIVE otro siman diamars!
ORANJESTAD – Pa un motibo fuera di alcanse, e programa pa awe nochi cu invitado Prome Minister Mike Eman, no ta sigui awe mas sino ta bay pa otro siman diamars 4 di November 2025, mesun ora esta 8:30pm. Durante e programa, e moderador Tito Laclé lo haci varios pregunta riba e tema di e.o. HOFA, pa haya clarificacion riba e tema actual. E programa ta pasa riba e pagina di Facebook di Noticiacla 2.0. y despues riba e pagina di youtube di Noticiacla. No perde!
Follow NoticiaCla
