'Caribisacion' di nos magistratura: Di 11 hues actual na Aruba, 6 tin pasado local

ORANJESTAD - Di 11 hues trahando den Corte, 6 tin pasado local cu ta traha na e sede aki. Asina presidente di Corte Comun, mr Mauritsz de Kort a bisa recientemente durante instalacion di dos huez. “Cu esaki mi a yega bek riba e valor di e 'Caribisacion' di nos magistratura” de Kort a sigui bisa. Pasobra, segun de Kort, pa Caribisacion, nos mester di huesnan y otro mandatarionan cu tin raiz riba nos islanan. Aruba mag ta orguyoso di e hecho cu di e 11 hues cu ta traha na e sede aki di Corte, 6 tin un pasado local. Y di 3 di nan, Universidad di Aruba ta nan alma mater. Esaki ta un logro maraviyoso pa un isla chikito y ambicioso. “Pero mi tambe ta mencionele pa nos keda vigila. Dushi Aruba, no perde e edge aki! “

APOYA CAPACITACION

Como Corte nos ta apoya capacitacion y enseñanza te caminda cu nos por. Nos por yuda pa dispersa conocemento di derecho, pa crea comprension pa e procedimiento hudicial y asina yuda internalisa e funcionamento di derecho cerca tur nos ciudadanonan. Nos ta haci esey durante nos dianan habri, den summer courses y stage. Nos huesnan gusta traha como docente na e universidadnan y nan gusta contribui na e opleidingnan di enseñanza profesional. “I ami como Presidente di Corte tambe sa probecha sesionnan manera esaki pa pidi atencion pa e topico aki. Hasta por bisa cu tur proceso y tur verdicto di Corte por fungi como manera pa siña y forma nos comunidadnan”. 

ROL MAS GRANDI DI CORTE

Pero sin duda ta keda hopi cos pa haci, tambe pa nos cerca Corte. P'esey gustosamente mi ta haci e pregunta: di ki manera Corte por hunga un rol mas grandi pa respalda capacitacion y enseñanza? Yuda ami, yuda nos cu ideanan y sugerencianan concreto. Nos ta dispuesto pa tende nan. Por ehemplo, gustosamente nos ta bin skucha y papia den e klasnan di scol di Aruba, Corsou, Boneiro, Sint Maarten, Sint Eustatius y Saba.” Pa drenta den combersacion bunita cu muchanan tocante di derecho of tocante di e significado di etica y moral den bida diario. Tanto riba nos islanan stima como den henter Reino. Otro ideanan ta mas cu bon bini. Laga nos sa! Preferibel via email si” de Kort a finalisa bisando.