Presidente di Corte: Na Aruba, Corte ta haya mas solicitud pa duna ordo pa paga

ORANJESTAD – “Nos ta mira cu e problematica di debe ta grandi na e paisnan caribense di Reino. Corte ta haya hopi solicitud pa duna ordo pa paga. Akinan na Aruba hasta mas cu na e sobra paisnan” tabata palabra di e presidente di Corte Comun mr Mauritsz de Kort recientemente durante e instalacion di dos huez pa Aruba. Den su discurso, mr de Kort a ilustra varios punto interesante y eski tabata un di nan, unda cu e ta sugeri cu porta mester introduci forma pa yuda hende maneha nan placa miho. 

MAL PAGADO NA ARUBA

Loke ta hala atencion tabata cu na Aruba pues, tin mas mal pagado compara cu e otro islanan. “Podise cu na Aruba creditornan sa miho cua caminda mester cana pa acerca Corte pa esaki, pero na mesun tempo ta un señal for di e comunidad” de Kort ta sigui bisa. “Aparentemente, nos tin di haber cu cantidad di hende cu no ta logra yega na fin di luna, cu ta fia placa cerca terceronan y den e pio caso ta bira victima di loan sharks. Y si despues di esey ahinda no ta logra financieramente, ta involucra hues, cu lo duna un ordo pa paga”. 

INTRODUCI SANEAMENTO DI DEBE?

P'esey, pa esnan cu ta den situacion financiero asina problematico, de Kort ta sugeri cu banda di e instrumento di suspension di pago, nos lo no mester introduci saneamento di debe tambe? Esaki lo ta un recurso util pa yuda hende riba caminda na un perpectiva nobo. 

CONCIENCIA FINANCIERO

Pero segun e magistrado, ta ahinda mas importante pa crea consciencia financiero prome cu e cosnan ta bay robes. Control di presupuesto y habilidadnan financiero ta habilidadnan cu ta sirbi hende henter nan bida. “Nos tur tin mester di esey. Y enseñanza – tur caminda den nos Reino – ta hunga un rol crucial den esaki” de Kort ta bisa den e parti aki di su discurso.