Na Corsou, Corte a dicidi cu Ramon Chong no por bira minister

WILLEMSTAD - Despues di tres aña di prosedura den sala di korte, ayera korte a dikta ku Ramon Chong no ta atmisibel den kaso ku el a entamá kontra di Chester Peterson kende tabata formadó di gobièrnu na mart 2021, gobièrnu di Kòrsou i tambe promé minister di Kòrsou. Chong a presentá 5 punto kual tur ta basá pa deklará desishon di formadó Peterson nulo pa keda sin nombr’é komo kandidato pa minister. Chong ta alegá ku su karchi kastigu no por keda para pa largu tempu. Riba tur e sinku puntonan, wes a deklará Chong no atmisibel den su demanda. Un kos ta sigur ku abase dje sentensia ku Chong a haña na 2003 pa soborno pasivo, e no por bira minister pa Kòrsou, segun e sentensia aki.

Na mart 2021 despues di elekshonnan di parlamento, Chester Peterson a keda designá komo formadó dor di gobernadó. Chong a keda apuntá dor di Partido Nashonal di Pueblo (PNP) komo kandidato pa minister enkargá ku asuntunan di ekonomia.

Wes a indiká ku ta e formadó mester husga un kandidato abase di e lei di Screening. I si e kandidato su investigashon no ta korekto, ta na e formadó pa no presentá e persona aki komo kandidato na gobernadó pa bira minister. Chong a keda kondená na desèmber 2003 na 2 luna di prisòn pa soborno pasivo (e tabata diputado e tempu ei pa PNP). Dia 4 yüni 2021, Peterson a informá Chong di lo no presentá kandidatura di su persona pa bira minister dor di e sentensia. El a haña e sentensia dor di investigashon ku prokurador general a hasi, kual ta pará den e lei di screening, esta un investigashon hudisial. E sentensia no a keda eliminá for di e sistema hudisial. Es mas e ta pará den Dokumentashon Ulandes ku ta manehá e sistema hudisial di Kòrsou p’e asuntunan aki di kastigu.

Banda di esaki, e funshon di minister di MEO segun gobièrnu a keda yená kaba, pues Chong no por bira minister. P’esei korte no por ordená gobièrnu pa bolbe presentá Chong komo kandidato minister. Ademas e formadó su trabou a terminá dia 15 yüni 2021 ora ku gabinete Pisas II a sinta. Debí ku Chong t’esun ku a pèrdè e kaso e tin di paga gastunan di e proseso ku ta na 3750 florin. NOTA: Texto ta scirbi den Papiamento fonetico di Corsou.