Caso “Asesinato Hato” a inicia awe na Corsou

WILLEMSTAD – Awe mainta a inicia e caso ‘Hato’ den sala di Corte na Corsou. E caso ta relata e asesinato cu a sosode casi un aña pasa riba 15 di juli 2014 na aeropuerto Hato, unda cu dos persona, Jais Juliana y Shantley Arnhem a perde nan bida. Corte a reserva dos dia pa trata e caso aki. Tanto awe como mayan, lo tin sospechosonan cu tin cu presenta. Awe mainta Givency Maria y Renaldo Martina ta e dos sospechosonan cu ta presenta den Corte. Maria su abogado ta mr. Alicia Blonk y abogado di Martina ta mr. Johannes. E hues ta e mesun cu a trata e caso Wiels.

PROME SOSPECHOSONAN

E dos personanan aki no ta esnan principal den e caso, sino mas bien esnan cu lo a ‘wak’ e tiroteo sosode, y tabatin informacion y cierto detaye di e caso. Awe mainta nan a conta huez kico nan ‘envolvimento’ tabata den e caso. Nan dos tabata den un auto na e sitio ora cu e tiroteo a sosode. Maria ta esun cu tabata stuur, y Martina ta e pasahero den auto. Nan a admiti di tabatin arma den nan poder, pero cu nan no a participa den e tiroteo. Nan conoce esnan cu a tira si, y a sigui nan despues, bay for di e sitio, pa polis no gara nan pa motibo di un arma cu un di nan tabatin, esta un 9mm. Asina nan a sigui conta huez kico tur nan a pasa aden e anochi ey, casi un aña pasa.

MAYAN

E intencion ta pa mayan trata esnan mes cu tabata envolvi den e tiroteo, entre nan esun conoci como Adrian Martha (26), alias "Venenu" y Raily Bart. Colaboracion y foto, Yves Cooper.