IPKO: A logra acuerdo riba ‘geschillenregeling’ na Hulanda

DEN HAAG – Despues di varios aña di discusion, fraccionnan di Hulanda, Aruba, Corsou y St Maarten a haya otro awe riba e creacion di un ‘geschillenregeling’. E acuerdo a wordo logra awe mainta riba e di dos dia di e reunionnan IPKO . E geschillen regeling ta nifica un creacion di un instituto pa atende cu conflictonan legal cu tin di haci cu areglonan di Statuto di Reino, entre paisnan di Reino. E texto ta apenas tres frase, pero cu ta trece un trankilidad ora cu tin asuntonan di p.e. conflicto entre dos pais den Reino.

PUNTONAN ACORDA

Entre e puntonan acorda, tin cu apunta un ‘Hoge Raad’, of un ‘Corte Comun independiente pa resolucion di conflicto’, of un ‘Hoog College van Staat’, como organo encarga cu e resolucion di conflicto pa Reino Hulandes. Ademas ta acorda cu e resolucion di conflicto ta wordo sella pa medio di un decision ‘bindend’, cu e posibilidad pa negoshacion di e conflicto prome cu esey sosode. Pues prome cu yega na e decision final, tin chens pa negosha ainda. Unabes cu e decision final wordo tuma, esey ta final tambe. Tambe a yega na un acuerdo cu pa yega na un alcanse di e resolucion di conflicto, mester uza conflictonan huridico estricto, cu respecto na disposicion legal.

CREDITO

Unabes cu e acuerdo a wordo sera, tanto fraccion di AVP como MEP a tuma e logro pa nan cuenta y a cargue como nan logro politico. Hecho ta cu, e acuerdo aki a keda estableci y a yega na otro den un consensus importante entre 4 pais den Reino Hulandes. Wak e puntonan di e geschillenregeling aki.