Croes: Barco cu HFO mas barata cu a yega Aruba, por resulta den tarifa mas abou di awa y coriente

ORANJESTAD - Diahuebs 15 di Februari ta un dia grandi pa Aruba. Asina minister Glenbert Croes a anuncia publicamente diabierna, pasobra un barco carga cu HFO (heavy Fuel Oil) mas barata a yega Aruba. Segun e mandatario, esaki mester conduci na tarifa di awa y coriente mas barata tambe. E mandatario a recorda cu ta den proceso di transiscion pa gas natural. “Mientras tanto, mester cumpra ‘heavy fuel oil’ cu ta cumpli cu e specificacionnan cu WEB ta exigi, pero di paisnan cu ta ofrece mas barata, cu e meta pa baha e prijs di awa y coriente” e mandatario a bisa. 

Minister Croes a expresa di ta sumamente contento y orguyoso cu riba un dia manera 15 di Februari 2024, Gobierno ta logra pa e prome barco di "heavy fuel oil" di Venezuela yega Aruba. Cu esaki Gobierno por cuminsa e era, pa logra baha e tarifa di awa y coriente, manera a wordo priminti na e pueblo di Aruba. Esaki sigur ta habri e caminda pa crea e oportunidad pa Gobierno por cumpli cu e promesa aki. 

“Combati costo di bida, kiermeen combati pobresa, combati costo di bida, kiermeen logra progreso, y esaki pami, como Minister di Energia, y formando parti di Gabinete Wever-Croes II, ta e prioridad di mas grandi. Mi ta sumamente contento y orguyoso di mira cu e trabou cu nos a bin ta eherciendo tin su frutonan. Nos ta impulsando Aruba den un era nobo pa bienestar y na interes di nos Pueblo." Segun e mandatario, esaki ta un logra di FMSA, TDEA, Harttree y PDVSA cu a coopera pa haci e logro aki na bienestar y interes di nos Pueblo.