Ciudadanonan ta sigui keha riba e problema di cachonan di caya

ORANJESTAD – Ciudadanonan ta sigui keha riba e situacion di cachonan riba caya y e molester cu esaki ta causa. Pero loke ta cansa nan mas ainda, ta e hecho cu nan yamada no ta wordo scucha. Of mas pio, nan ta wordo manda di cashi pa muraya. Rednan social ta yen di tipo di criticanan asina. Un caso awe atrobe ta unda cu un ciudadano ta keha cu e la bay pidi auxilio na polis, y e polis ta mand’e yama polis di bario. Ora cu e yama polis di bario, no tin contesta. Den su caso, ta trata un caso specifico di molester di cacho den centro di Oranjestad, na Sisalstraat na Ponton. E persona aki ta bisa di a conta por lo menos 30 cacho entre Ponton pa Playa cu ta core tras di hende. “ Inacceptable! Unda nos leynan a keda?”e ciudadano aki ta critica. “Polis a mandami polis di bario. Ni contesta! Ta core tras di bicicleta, hende etc. Sisal Straat na Ponton. Di Ponton pa Playa ma conta 30 cacho riba caya ta core tras di hende!” e ta finalisa bisando.

E PROCEDURA

Ta conoci cu ora cu tin problema asina, por yama Bureau City Inspector, tambe via nan Fixi App. Of tambe e Centro di Control di Cacho. Problema ta cu no tur ora nan ta contesta y e persona e ora ta bira desespera debi na e falta di oido cu e ta haya. Manera nos a relata, no ta prome biaha cu e tipo di criticanan aki ta aparece riba rednan social, sclamando pa solucion. Noticiacla a comrponde cu gobierno ta trahando riba un plan pa remedia e situacion, pero esaki ta tumando su tempo, lamentablemente, y mientrastanto e problema ta sigui aumenta. Si ta bon, pa fin di e aña aki, lo mester tin un centro special cla, unda cu por yuda soluciona e problema mas miho.