Mayoria candidato pa minister na St. Maarten ta conoci

WILLEMSTAD - Poko poko pero sigur e kandidatonan pa puestonan di minister na St. Maarten ta birando konosí. Gobernadó Ajamu Baly a nombra lider polítiko di partido URSM,e yu di Kòrsou dr. Luc Mercelina e formadó di e próksimo gabinete di St. Maarten despues ku partidonan URSM, DP, PFP i NOW a firma un akuerdo di intenshon pa traha huntu.

Kada partido a haña 2 asiento durante elekshon dia 11 yanüari último i huntu ta forma un mayoria di 8 di e total 15 asientonan den parlamento di e isla ku ta forma un union monetario huntu ku Kòrsou. E gobièrnu ku lo forma ta konsistí di total 7 minister.

Manera ta ampliamente konosí Mercelina mes ta kandidato pa bira promé minister di St. Maarten, ounke tin un aspekto ku mester investigá mas aleu ku ta su ofisina di dòkter.

Mercelina a indiká ku e no ke deshasí di e ofisina i mester wak te kon leu esaki ta kompatibel ku e funshon di promé minister. URSM a negoshá tambe e ministerio di VSA (“Volksgezondheid, Sociale Ontwikkeling & Arbeid”) pero no ta konosí ken lo nombra den e funshon aki.

Kandidato di e partido pa e puesto di Minister Finansa ta Marinka Gumbs. E ta e aktual direktor interino di servisio postal di St. Maarten. Gumbs no tabata riba lista di DP pa último elekshon.

Kandidato pa minister di Turismo, Asuntunan Ekonómiko, Transporte i Telekomunikashon ta Grisha Heyliger-Marten. Heyliger-Marten ta kasá di Theo Heyliger, eks minister di pais St. Maarten i aktualmente ta sintando un kastigu di prizòn pa aktonan froudulento.

Lider di Partido Demokrat, Sarah Wescott-Williams lo ta kandidato pa bira presidente di parlamento. partido NOW tambe lo nombra 2 minister den e aktual gabinete.

Lider polítiko di NOW, Christophe Emmanuel ta kandidato pa bira minister di Enseñansa, Kultura, Hubentut i Deporte. Lyndon Lewis ku tabata number 10 riba lista i ta konosí kaba den e kadena hudisial komo kolaboradó na Ministerio di Hustisia ta kandidato pa e puesto.

Partido PFP ta skùif Raeyhon Peterson dilanti komo kandidato pa minister di VROMI (Volkshuisvesting, Ruimtelijke Ordening, Milieu & Infrastructuur”). Peterson lo ta alabes e vise promé minister.

E tabata number 2 riba lista pa elekshon di 11 yanüari i a sirbi 4 aña den parlamento. Kandidato di PFP pa bira minister Plenipotensiario na Den Haag, ta Patrice Gumbs. E ta number 4 riba lista durante último elekshon.

Unabes ku e kandidatonan pa minister pasa e proseso di screening i nan kandidatura ta aprobá, lo kuminsá skùif den parlamento pa asina otro kandidatonan riba lista remplasá e parlamentarionan ku ta bira minister.NOTA: Texto ta scirbi den Papiamento fonetico di Corsou.