Plan di Mayor ta celebra e prome Plan di Mucha

ORANJESTAD - Dia 21 di november 2023 a aproba unanimamente e ley di Plan di Mayor den parlamento di Aruba. Ley di Plan di Mayor ta ensera cu mayornan di yiunan menor di edad cu ta bai separa of divorcia ta obliga pa ley pa traha un documento legal yama “Plan di Mayor” caminda nan lo stipula con nan lo bai comparti e responsabilidadnan pa cu nan yuinan.

Plan di Mayor ta traha basa e.o. riba e tratado internacional di derecho nan di mucha articulo 12; unda cu ta indica tur mucha tin derecho di wordo scucha, riba nan precoupacionan, deseonan y necesidad nan.

1 di maart 2024 e ley Plan di Mayor ta bai den vigor. Mayornan ta wordo manda na Plan di Mayor door di corte di Aruba of por ‘walk in’ pa por haci un intake gesprek caminda e professional lo indica den ki fase di conflicto e mayornan ta encontra nan mes y lo referi e mayornan na e intervencion cu mas ta pas pa nan situacion.

●       Fase 1: Mayornan ta comunica cu otro bon y nan mes por traha e plan di mayor y entrega esaki na corte.

●       Fase 2: Mayornan tin un tiki problema pa comunica cu otro y lo wordo recomenda na un “familie mediation” cual ta encera 5 “oudergesprekken” y 1 “kindgesprek” y asina por yega na un Plan di Mayor y Plan di Mucha. E trayecto tin un duracion di maximo 6 siman.

●       Fase 3: Mayornan no ta compronde otro y ta encontra nan mes den un separacion compleho, pa nan ta recomenda e intervencion “ouderschapblijft”, y den un trayecto di maximo 9 luna por yega na un Plan di Mayor y Plan di Mucha.

Plan di Mayor ta marca historia na trece ayudo pa famianan durante y despues di un separacion, cu intervencionan enfoca riba mayornan y intervencionan enfoca riba e mucha. Un mayor bo ta keda pa semper, hasta despues di un separacion.

Plan di Mayor ta situa na Sabana Blanco 68-c na Centro pa Hoben y Famia.

Pa cualkier informacion por tuma contacto na +297 5281200/ +297 5281214 of email na plan.di.mayor.aruba@gmail.com of riba e webiste na plandimayor.org