ATIA y Douane a re-inicia proyecto pa optimalisa relacion

ORANJESTAD – Ariba 13 februari 2024, Aruba Trade & Industry Association (ATIA) hunto cu Departamento di Aduana Aruba a inicia, den un sala completamente yen, un proyecto nobo yama “Optimalisacion di Relacion” (“Douane Relatie Optimalisatie Uurtje”). E iniciativa aki no ta uno nobo, pero 20 aña pasa ATIA y Aduana a introduci algo similar cu tawata un exito rotundo. E idea di e sesion aki ta cu tur comerciante por pasa libremente y haya informacion of haci pregunta specifico na e Management Team di Aduana sin compromiso. E meta final ta cu comerciante, brokers, y otro importador por crea un conexion y relacion mas personal cu Management Team di Aduana. E sesionnan aki lo wordo organisa mensualmente riba cada di dos diamars di luna na oficina di Aduana di 3or pa 4or y mei, pues e proximo sesion lo ta 12 maart 2024. 

Durante e prome sesion a toca e siguiente topiconan:

•       Rol y responsabilidad di Aduana.

•       Ley di importacion nobo (“Algemene Landsverordering Douane en Accijnzen – ALDA”), cu awo ta drentando den su trayectoria di legislacion, pero no tin fecha pa bai Parlamento ainda. 

•       Calculacion correcto di “Douane Waarde”.

•       Ki ora si por inclui descuento of no especialment den caso cu haya descuento por ehempel riba websites manera Amazon of descuento ora cumpra “cash” of “bulk”. Mas info por lesa e comunicado di September 2022 (https://www.douane.aw/departamento-di-aduana-a-tene-reunion-cu-cua-y-atia-pa-loke-ta-e-cambio-riba-maneho-di-descuento-riba-factura/ ).

•       Proceso y procedura pa debolbe placa (“restitutie”).

•       Declaranten Cursus cu diamars awo 20 februari lo cuminsa cu su di 7 edicion. 

Despues di e presentacion di Director di Aduana Sr. Ricky Croes, participante nan por a hasi pregunta. Aki hopi participante a hasi uso di e oportunidad aki pa hasi pregunta en general pero tambe riba caso specifico cu ta toca nan compania. Punto nan interesante cu a bin dilanti ta:

•       Proceso pa reemplaza productonan cu a yega defecto, daña of expira.

•       Casonan specifico pa cargo aereo.

•       Caso nan mas specifico pa cu “douane waarde”.

•       “Coupons” riba Amazon, cu ta un topico cu Douane ta investigando y lo informa comercio y pueblo en general di dje pronto. 

ATIA lo bai agrega un recordatorio pa cada sesion riba su rednan social manera “Facebook, Instagram y LinkedIn”, pues si tin interes, ta pidi pa sigui su rednan social pa keda informa di tur ATIA su sesionnan y cursonan pa 2024. Si tin pregunta por semper tuma contacto cu e team di ATIA.