Avion di TUI mester a desvia pa pa Azoren debi na desorden di miembro di gang di Corsou

WILLEMSTAD - Ora bo subi na bordo di un avion i ku intenshon di biaha nuebe ora pa krusa Oséano Atlántiko, bo ta asumí ku kosnan lo bai den un ambiente plasentero. Awèl esei tabata leu di e kaso pa pasaheronan ku a abordá un avion di TUI ayera ku a sali di Hulanda pa Kòrsou. Esei pa motibu ku un hòmber Yu di Kòrsou (YDK) a disidí ku e ta zundra e tripulashon, ku e ta insultá tur hulandes na bordo, ku e ta pasa man na atras di stewardessnan, pues ku e ta kousa teror na bordo dje buelo aki.

Dos ora di teror

T’asina ku e portal di Corsou EXTRA tabatin kontakto ku un persona ku tabata na bordo dje avion aki ayera, i el a splika ku luho i detaye kon henter e asuntu aki a bai. El a splika ku for di momentu di abordá na Schiphol e persona aki tabata aktua poko straño, e tabata papia duru i parse bou di influensia di algu. Ora ku tur hende a abordá i ku e buelo a lanta pa 9 or di mainta (ora Hulandes), el a sigui ta papia duru ku otro hendenan. Pero kosnan a kambia hopi lihé na momentu ku el a falta rèspèt i mishi ku atras di un dje stewardessnan, i e último aki a hala su atenshon naturalmente.

Dado momentu tabatin un mucha chikí a lanta bai kushina i pidi si e por haña un saku di chips, pero e stewardess a inform’é ku ta un djis ta bai kome. E momentu ei e hòmber YDK a lanta i kuminsá zundra, insultá e ayudantenan. Dado momentu asta el a grita ku ta miembro di e gèng NLS (No Limit Soldier) e ta i ku su nòmber ta “Zimmerman” i ku e ta kapas di tur kos.

Komo si fuera no ta basta el a bai para parti dilanti i insultá tur hende den avion, i partikularmente el a bai den kara di algun pasahero hulandes i ‘koba’ nan, deklará ku e tin rabia riba hulandesnan, ku ta nan tin Yu di Kòrsou nan oprimí. Tur hende tabata bou di tenshon ya ku no tin niun kaminda di kore bai, sino di sinta i presensiá e show dje individuo intoksiká aki. Remarkabel tambe tabata ku dado momentu e tabata papia un lenguahe straño ku niun hende tabata komprondé, i el a bisa ku e ta praktiká voodoo tambe.

Tabata parse ku e siguiente kaminda ku e lo kier a drenta ta den kabina dje pilotonan, pero e stewardessnan a para na rei banda di otro i impedí e hòmber di drenta. Segun nos informante na bordo, un dje stewardessnan a tuma e kurashi di kore bai patras i roga algun hòmber Yu di Kòrsou korpulento pa nan a duna un man, pasobra e kos aki lo por terminá den un tragedia. E lo por a disidí di habri e porta dje avion riba pleno buelo, ku tur e konsekuensianan ku esei lo por a trese kuné.

Finalmente tabatin kuater hòmber ku sufisiente forsa i kurashi pa a dominá e tipo aki, ku opviamente tabatin forsa fuera di normal. I tur esaki a sosodé pa dos ora largu. A logra dominá “Zimmerman”. Segun nos informante, entretantu riba e pantaya den lomba di stul el a nota ku e avion tabata desviando. No a dura muchu ku e kapitan dje avion a partisipá ku pa motibu dje situashon aki el a desviá pa Islanan Azore, i asina nan a aterisá na Lajes. Aki polis spesial kontra terorismo a presentá na bordo i “vouw” e hòmber bai kuné.

Komo si fuera no ta basta, promé ku a lanta buelo e kapitan a anunsiá ku tabatin un di dos persona ku mester a bandoná e avion. A resultá ku ta otro YDK ku a pasa man na atras di stewardess durante e buelo. Finalmente e piloto a puntra si tin mas hende ku lo no komportá nan mes durante e buelo, pa nan bandoná e avion.

Despues di 3 ora na Lajes pa baha hendenan non-grata i pa yena kombustibel, a lanta buelo i finalmente tur sobrá hende a yega Kòrsou sano i salvo pa 7 or djanochi. NOTA: Texto ta scirbi den Papiamento fonetico di Corsou.