Marlin: Autonomia ta status temporal na caminda pa independencia di St. Maarten

WILLEMSTAD - E status outónomo den Reino ku St. Maarten a optené na 10 òktober 2010 ta un kambio temporal den e status konstitushonal di e isla na kaminda pa independensia. Asina èks lider polítiko, promé minister i parlamentario pa partido  National Alliance (NA), William Marlin a bisa djabièrnè último den parlamento.

Djabièrnè a klousura e periodo parlamentario 2020-2024 di St. Maarten pa asina e parlamento nobo a tuma asiento djasabra. “Sea nos gusta òf laga tin dos asuntu ku ta pendiente ainda ku no por keda sin atendé kuné: independensia i reparashon. St. Maarten no por kontinuá den un situashon kaminda e no ta karni ni piská”, Marlin a bisa.

St. Maarten ta forma aktualmente un union monetario huntu ku Kòrsou i ta kompartí e mesun moneda i banko sentral. “Ami semper tabata di opinion ku 10-10-10 tabata un kambio temporal di status riba e kaminda pa independensia i, meskos ku a konsultá ku e pueblo den un referèndem pa asina por a yega na e status konstitushonal aktual, ta e pueblo lo disidí al final den un referèndem riba independensia.”

Relashoná ku e tópiko di pago di reparashon Marlin ta bisa ku St. Maarten ya kaba ta parti di e moveshon mundial ku ta eksigí rekuperashon, un movementu ku Karibe ta lider den dje konhunto ku partnernan di e Union Afrikano i otronan. El a bisa ku gobièrnu hulandes den persona di promé minister demishonario, Mark Rutte i Rei Willem Alexander a dal e promé pasonan den e direkshon aki pidiendo despensa pa e ròl di Hulanda den e “sistema maligno” di sklabitut.

Na opinion di Marlin mester insistí den hiba e diskushon ku gobièrnu hulandes riba rekuperashon. “Mi sa di eksperensia ku esaki lo no bai ta fásil. Nos ta kòrda kiko a pasa na momentu ku ami komo promé minister a tuma posishon kontra Hulanda relashoná ku nan proposishon inaseptabel despues di e pió desaster ku St. Maarten a pasa aden, esta orkan Irma na 2017. Eventonan ku a tuma lugá despues a proba ku mi posishon asumí tabata esun korekto.”

Den su diskurso den parlamento Marlin a reflehá riba su karera polítiko aktivo ku a dura 37 aña. “Tin un ora pa bini i tin un ora pa bai”, Marlin a bisa na komienso di su diskurso. “Pa ami e ora di bai a yega, manera mi a anunsiá kuater aña pasá.”

Marlin a bira un polítiko 45 aña pasá i tabata kofundadó di e partido St. Maarten Patriotic Movementu (SPM) ku a lanta 15 desèmber 1978. Esaki tabata den tempu ku gigantenan den polítika di St. Maarten tabata tene duru na poder. A dura 8 aña pa porfin na 1987 SPM a optené 2 asiento den Konseho Insular i Marlin huntu ku Vance James (q.e.p.d.) bira miembro.

For di e momento ei Marlin a keda 37 aña konsekutivo den un funshon polítiko manera miembro di Konseho Insular, diputado, miembro di parlamento di Antianan Hulandes, miembro di parlamento di St. Maarten i minister pa pais St. Maarten.

Na 1991 pa promé biaha SPM a logra forma un koalishon na nivel insular despues di a gana elekshon ku 4 asiento. Huntu ku partido PDP di Millicent de Weever ku a haña 2 asiento a forma e promé gobièrnu di koalishon lagando DP den oposishon ku 3 asiento. Apesar ku e koalishon a wanta apénas 6 siman, Marlin ta bisa ku esaki a marka inisio di un era nobo den polítika di St. Maarten ku gobièrnunan di koalishon ku a dura te ku dia di awe. NOTA: Texto ta scirbi den Papiamento fonetico di Corsou.