Criminalnan Colombiano ta rebende cigaria cumpra di Aruba, ilegalmente dunando nos mal nomber

LA GUAJIRA – Segun varios medio Colombiano diamars, Fiscalia General di Colombia a confisca propiedad na balor di 3.500 miyon peso Colombiano perteneciendo na un red di criminal, dedica na contrabanda di cigaria, procedente for di Corsou, Panama y Aruba. Noticiacla a opta pa cita un di e medionan aki, esta larazon.co. Despues nan tabata distribui esaki pa resto di e pais, evadiendo control di douane. Pero investigacion di noticiacla riba e tema aki, a resulta cu tin un otro buelta di e storia aki.  Ora di busca afo for di Aruba kico realmente ta pasando, a ‘dal’ den director di Freezone Aruba, Greg Peterson, cu e tipo di noticianan aki no ta nobo, y ta splica cu ta trata di personanan cu ta cumpra cigarianan legalmente exporta for di Aruba, pero cu ta rebende nan ilegalmente, dunando Aruba un mal nomber. “Esaki semper ta un malinterpretacion” Peterson ta bisa, riba pregunta di e portal aki. “ Comerciantenan na Aruba ta bende cigaria na negociantenan cu ta bin for di Aruba, pero ta wordo bendi totalmente legal. Tin hende despues na Colombia cu ta purba smokkel e productonan pa drenta Colombia sin paga impuesto” Peterson ta sigui bisa. “ Esaki no kier men cu e commerciante Arubiano ta envolvi den e tipo di conducto ilicito aki” Peterson ta sigura. “Nos hendenan mester cumpli cu cierto regla y douane tambe ta envolvi cu e controlnan aki. Nos clientenan echt no kier ta envolvi cu e tipo di asuntonan interno Colombiano”, Peterson a finalisa bisando.Un di e exportadornan aki, esta Romar Trading tambe a confirma e problema aki awe mainta na e portal aki. 

E STORIA

Bek pa e noticia original for di Colombia di e confiscacion, un muher tabata na cabez di e red y tabata encarga cu duna instruccion. Na tur, a confisca 7 propiedad, 7 auto, y 9 establecimento cu tabata wordo usa pa laba e placa di e negoshi. E propiedadnan confisca tabata den Maicao (La Guajira) y Baranquilla, ambos na Colombia. E raportahe no ta bisa si for di compania na Aruba e compra tabata haci. Informacion cu e portal aki a haci, ta mustra cu tin por lo menos tres pa cuater agencia cu ta envolvi cu importacion y exportacion di cigaria, pero tur ta completamente legal.