Scolnan alertando mayornan riba wega “Charlie Charlie Challenge”

ORANJESTAD – Scolnan na Aruba a cuminsa manda carta pa mayornan, relaciona cu e wega nobo ‘Charlie, Charlie Challenge”. E fenomeno nobo na Aruba aki, ta e locura nobo entre hobennan, y no den un forma mucho positivo. Mirando e peliger cu e wega aki tin, NoticiaCla.com a haya informacion cu for di ayera, varios scol a cuminsa manda carta, alertando nan pa prohibi nan yiunan pa hunga e wega aki.

ORIGEN

E wega tin un origen mexicano y ta wordo compara cu e wega ‘Ouija Board’ cu ta laga hende papia supuestamente cu spirito. E wega ta rekeri un pida papel, dos potlood, y hobennan cu hunga e wega, ta graba esaki cu nan telefon y pone riba social media. E intencion di e wega, ta pa laga bo mes wordo guia pa un demoño mexicano cu yama Charlie.

CON PA HUNGA

Riba e papel ta skibi e palabranan Yes, y No (si y no) bow di otro, y ta pone e dos potloodnan estilo un crus. E siguiente paso ta pa puntra e ‘spirito’ Charlie si e ta presente. Ta puntra e spirito” Charlie Charlie, can we play”, of “Charlie Charlie, are you there”. Esta ta puntra e spirito si e tey y/of si nan por hunga cune. E potlood nan ta suppose di move nan mes, pa sea e palabra yes, of no, (si of no), y asina e wega ta continua. Unabes cumpli, ta benta e potlood nan abou y ta bisa Charlie “Goodbye” osea Ayo.

MISTERIO

E forma con e potlood nan ta move, of si ta berdad cu nan ta move nan so, ta keda un misterio. Hopi ta pensa cu ta e muchanan mes pa nan movecion inconciente, ta pone cu e potlood nan ta move. Hecho ta cu, e ta creando un cos den e muchanan cu no ta saludabel segun informacion cu NoticiaCla.com a compila. Como tal mayornan a cuminsa spanta, y scolnan a cuminsa manda carta pa e mayornan splica nan yiunan di e peliger di e weganan aki, cu tin hopi parecido na e mesun tipo di wega misterioso, Ouija Board, cu tabata supuestamente laga bo papia cu spirito di hende.