Final di carnaval 70 di Aruba tabata hopi colorido y largo

ORANJESTAD – Aruba a celebra e final di Carnaval 70 en grande e fin di siman aki, cu e culminacion diadomingo den Oranjestad. Segun calculo di polis, un total di 4500 participante reparti den 10 grupo a cuminsa for di 10’or di mainta, (e prome grupo por lo menos), y e ultimo grupo a yega e punto final pa 8’or y mei. Tene cuenta cu polis su plan original tabata pa e ultimo group tabata poni pa yega 6’or di atardi, pues esaki no a logra mirando cu e gruponan tabata kier tempo suficiente pa por desplega nan bunitesa. No ta conoci si ta bondad di polis of presion di partipantenan a pone cu a dicidi di hala e ora di yegada cu 2 ora. Esaki a nifica si, cu e ultimo tres gruponan a yega ora cu solo a bay caba. Esey a pone cu e ultimo gruponan a dicidi di ‘sende’ nan luznan y a yega e final cu luz. Cu 41 detencion, dos biaha mas cu normal, e carnaval a yega na su final cu kimamento di momo pa 9:15pm riba Harbour Arena.Un di e kehonan continuo si tabata e hecho cu tabatin hopi truck y otro tipo di vehiculo di motor, cu tabata kibra e bunitesa di e parada. Hopi, si no ta mayoria, no tabata dorna y si tabata dorna, tabata cu propaganda, cu ta comprendibel di un parti, pero no a contribui cu e bunitesa di e gruponan respectivo. Tabatin algun rato cu tabatin sigur 4 pa 6 truck tras di otro, kibrando e parada. E potretnan ta cortesia di Noticiacla su droneshots.