Van Huffelen na Tweede Kamer: Combersacionan riba RAFt ta bayendo dificil

ORANJESTAD – Combersacionan cu Aruba riba e tema di RAFT ta bayendo hopi dificil (heel stroef, ta e palabra cu e secretario di estado Hulandes Alexandra van Huffelen a usa na Hulandes:red). Asina e mandatario a bisa den e debate cu a tuma lugar diahuebs atardi ora di Hulanda. E debate tabata cu e miembronan nobo di Tweede Kamer cu a keda eligi na November aña pasa. E mandatario a recorda e miembronan nobo cu e ta siguiendo e mocion di e miembronan anterior cu a exigi condicionan pa cu Aruba pa cu e pago di debe di Covid. Algo cu segun e mandatario, gobierno Hulandes a sostene. 

RIJKSWET

E tema a bolbe bin dilanti, unda cu e mandatario a splica e miembronan nobo cu di parti di Aruba ‘ainda’ nan no ta convenci cu e supervision financiero mester bin via un ley di Reino, enbez di un ley local, esta un landsverordening. “E discusion a tuma lugar y na dado momento tabatin tononan basta fuerte di ambos, of un banda, y cu no ta haci nos (Hulanda) mucho contento”, e mandatario a bisa. Segun e mandatario, e ‘desgracia’ no ta asina tanto den palabranan fuerte cu ta cay di ambos, of un banda, sino cu e conclusion di e discusion aki ta cu Aruba ta pagando un interes hopi halto, cu de facto placa di pueblo ta pagando. “Placa cu ta monta na centenares di miyones y esey ta un caso serio”, e mandatario a sigui bisa.

BISHITA

E mandatario a bisa cu fin di e luna aki pa comienso di otro luna, e mandatario lo bishita e.o. Aruba (Corsou y St Maarten) y spera cu e por haya un acuerdo cu Aruba. Prome cu esey, premier di Aruba mes lo ta na Hulanda tambe durante cual e ta spera di por tin un combersacion solido riba esaki pa haya otro riba e tema aki. E la sigura cu tanto Aruba como Hulanda a adkeri conseho huridico riba e tema aki y lo trata esaki tambe durante e combersacionan. Tambe lo toca e parti di sugerencia di Aruba esta un concepto hybride, esta un concepto di ley cu ta mitar ancra segun ley di Reino y mitar den un forma di landsverordening, esta un ley local. Por scucha e parti aki di e debate, AKI. Mientastanto pa e debate completo por click AKI.