Danilo Werleman ta reemplaza Hans Schog como CEO Garage Cordia

ORANJESTAD - E aña aki Garage Cordia Aruba ta celebra 50 aña di existencia, pero na mes momento ta conta 48 aña di trabou di Hans Schnog cu e compania, cu antes tabata di su tata. Durante un reunion cortico cu empleadonan, a anuncia awe cu e ta baha cu pensioen y cu desde inmediato a apunta Danilo Werleman como e Chief Executive Officer di Garage Cordia Aruba.

HISTORIA 

Garage Cordia Aruba a habri su portanan na juli 1965 cu solamente 10 auto den stock y algun mil dollar na piesa. E compania a sa di crece y desaroya su mes bou liderazgo y cu e vision di Hans Schnog, te bira un di e agencianan di auto mas grandi na Aruba, den cual a bende mas di 25 mil auto den e añanan cu a transcuri y cu miyones di piesa den stock. Mester bisa cu 10 aña pasa, na aña 2005, Garage Cordia Aruba a habri su portanan den nan edificio nobo na Camacuri cu mucho mas espacio pa por sirbi clientenan miho, cu mas facilidad y den un forma mas eficiente.

MARCA NOBO 

Y unabes eyden, 4 aña pasa a yama bon bini na e marca nobo for di China, esta e BYD, Build Your Dreams. Cu e marca nobo aki, manera semper, Garage Cordia a percura pa mecaniconan a sigui trainingnan special, percura pa tin un stock grandi di piesa y cu por para tras di e garantia di e auto.

HANS SCHNOG 

E plannan ta grandi y prome cu baha cu pensioen, Hans Schnog a percura pa tin un bon ekipo di maneho, cu algun cara conoci den mundo di maneho, encabesa pa Danilo Werleman como C.E.O. Na mes momento, Hans Schnog awor ta bay den “Advisory Board”. Otro miembronan den e Hunta di Supervision di e compania ta Don Mansur, Gerardo de Veer, Cees Droogh y Gerardo Oduber. Nan tarea primordial ta pa supervisa e gerencia nobo di e compania y ofrece guia y experencia pa por hiba Garage Cordia Aruba na e siguiente nivel di crecemento y desaroyo. Ta bon pa enfatisa cu e accionnan di e compania ta 100% den man di famia Schnog. Empleadonan di Garage Cordia Aruba a duna Hans Schnog un aplauso largo y bon mereci pa tur su añanan di dedicacion, experencia y di trabou duro pa por a construi un fundeshi solido cu awe e compania ta estableci riba dje. Cu e conocemento di mercado y representando e marca di auto mas bendi na mundo....Garage Cordia ta cla pa sigui crece den e añanan nos dilanti. Nan ta bon conoci no solamente pa bende autonan di calidad, pero specialmente pa ta e unico agencia cu tin e stock di piesa di mas grandi na Aruba.