Van Huffelen tristo cu no ta discuti riba deficit democratico

WILLEMSTAD. - Sekretario di estado, Alexandra van Huffelen ta lamentá inmensamente ku no tin desaroyo riba e diskushon di défisit demokrátiko den Reino. Apesar ku a para e konferensia ku tabatin e tópiko aki riba agènda, e ta primintí di lo sigui trese e défisit demokrátiko dilanti den su deliberashon ku e otro paisnan den Reino.

Asina Van Huffelen a duna di konosé durante un deliberashon ku e komishon fiho di Relashonnan den Reino di parlamento hulandes. “E momento pa a hiba un diskushon na nivel di Reino riba e défisit demokrátiko tabata durante e Konferensia di Reino planiá pa a tuma lugá 25 i 26 mart.”

Pero a kanselá e konferensia definitivamente. Motibu ta ku no a logra haña tur pais firma e protokòl pa kuminsá prepará pa e konferensia. “Aruba no a firma e protokòl i despues St. Maarten tampoko a firma. Pa kolmo St. Maarten ta den proseso pa forma un gobièrnu nobo. Mester warda e proseso aki terminá.”

Elekshon na Kòrsou i Aruba den 2025 ta mas motibu pa Van Huffelen a indiká ku kisas por lo pronto e Konferensia di Reino lo no tuma lugá. “Mi ta sinti un tristesa ku no ta hibando diskushon riba e tópiko aki pasobra a hasi un investigashonnan riba kiko ta e défisit demokrátiko i kiko por hasi kontra esaki. Pero lo no dal pasonan pa drecha e situashon.”

Gobièrnu di Kòrsou for di desèmber 2023 a indiká ku e organisashon di e Konferensia di reino ta wantá i lo no tuma lugá riba e fecha planiá. Pa e motibu aki gobièrnu no a presupuestá partisipashon na e konferensia. Lo a hasi esaki den un presupuesto supletorio na momento ku tin indikashon konkreto ku e konferensia lo kontinuá riba un otro fecha. NOTA: Texto ta scirbi den Papiamento Fonetico di Corsou.