RvA: Gobierno mester enfoca mas riba temanan local envez di discusion riba autonomia

ORANJESTAD – Politica na Aruba ta parce mas interesa den e tema di perdemento di autonomia, mientras cu e ciudadano comun ta parce mas interesa den temanan manera diversificacion di economia, mehoracion di infrastructura , y enseñansa. Asina e presidente di Raad van Advies, osea e 0rgano Consultativo di Aruba David Kock. Como e prefacio di e rapport annual di e organo, e ta pinta un cuadro actual na Aruba di e situacion y aki e ta ilustra e tema aki. “Ta parce cu e salida di e presion financiero a move pa e discusion di un posibel perdida di nos autonomia debi na exigencianan impone pa Hulanda riba e implementacion di e acuerdonan previamente acorda cu Aruba” Kock ta sigui bisa. Segun Kock, e cambio di panorama politico Hulandes despues di e ultimo eleccionan, tambe ta parce di hunga un papel den e urgencia, cu antes tabatin pa ehecucion di varios plannan pa mehora e situacion di Aruba riba varios tereno. “Los di e hecho cu mundialmente door di cooperacion y integracion economico, e concepto ‘autonomia’ ta menos comun aworaki, e cuestion aki awor ta parce mas un discusion politico cu e pueblo no tin interes aden”. Fuera di e puntonan cu si e pueblo ta preocupa cune, tin e retonan manera e situacion cu a sali for di man di e planta di purificacion di awa (RZWI), e escases den personal den sector di hotel, y e escases di vivienda. “E aumento di enviehecimennto di pueblo y e problema social bou di hubentud, tambe ta cay bou di e preocupacion cu ta tene e pueblo ocupa, envez di un discusion abstracto riba autonomia”, e presidente di e organo ta sigui bisa. “Pesey ta importante pa concentra tur atencion den direccion di e temanan cu door di e pandemia a bin na superficie”.  

Loke tambe ta hala atencion di e Organo Consultativo, ta cu den 2023 tabatin menos concepto di ley cu a keda presenta na RvA pa conseho, compara cu añanan anterior. E organo ta spera cu den 2024 esaki lo cambia mirando e cantidad di cambio di maneho cu a keda anuncia. Pa lesa e prefacio completo di Kock y mira e rapport, por click AKI.