Na Corsou, gobierno y sindicatonan ta den disputa riba fecha pa revoca ley di 12,5%

WILLEMSTAD - Sindikatonan representá den e órgano di konsulta CGOA ta keda para riba nan punto ku mester revoká e lei di 2020 pa kòrta ku 12,5 porshento den kondishon laboral di e ámtenar ku forsa retroaktivo te promé di yanüari 2021. Esaki miéntras ku gobièrnu den su “inzetbrief” pa CGOA riba e proposishon pa revoká e 12,5 porshento ta indiká ku ta hasi esaki ku forsa retroaktivo te promé di yanüari 2023.

E echo ku sindikatonan ABVO, NAPB, SAP, STrAF i Sitek i gobièrnu no ta riba e mesun liña ku otro riba e fecha ku mester revoká e lei di 2020 pa kòrta ku 12,5 porshento no ta nifiká ku a yega na un impase. Asina presidente di sindikato ABVO ta deklará pa EXTRA.

Djamars último CGOA a trata e proposishon di lei, despues ku gobièrnu a aprobá esaki den su reunion di 24 yanüari. Minister di Maneho di Gobernashon, Planifikashon i Servisio Públiko, Ornelio ‘Kid’ Martina ta bisa ku e lo bai bèk den seno di Konseho di Minister ku e posishon di e sindikatonan asina ku e notulonan di e reunion di CGOA ta kla.

Gobièrnu ta splika ku pago di indeksashon salarial, “loontrede”, i 3 porshento di lumpsum 2023 ta solamente posibel si hasi kambio riba e lei di 2020 pa kòrta ku 12,5 porshento den kondishon laboral di ámtenar. Konforme e lei aki pago di indeksashon, “loontrede” i lumpsum ta konhelá for di 2020 komo kondishon pa gobièrnu di Kòrsou a risibí sosten di likides pa kubri su gastunan i tambe ofresé sosten na sektor privá kaminda hopi trahadó a pèrdè trabou òf a entregá 20 porshento òf mas di nan salario.

E intenshon ta ku despues ku yega na un akuerdo ku e sindikatonan riba e proposishon e fecha ku ta den disputa lo manda e lei esaki pa Hunta di Konsulta (“Raad van Advies”) pa despues manda esaki pa parlamento.  Asina ta ku den e CGOA tin un obligashon pa yega na un entendimentu entre partidonan, un asina yamá “overeenstemingsverplichting”, entre gobièrnu komo dunadó di trabou i sindikatonan ku ta representante di trahadónan.

Den kaso ku no yega na un entendimentu entre partidonan e lei di CGOA ta duna kaminda pa kana pa sali for di e impase. Den kaso ku konstatá den CGOA ku tin diferensia di opinion por desviá for di e obligashon pa yega na un entendimentu i pidi Hunta di Konsulta pa un konseho.

Esaki ta un kaminda ku gobièrnu a yega di kana den pasado i haña konseho positivo di Hunta di Konsulta ku por desviá for di e obligashon pa yega na un entendimentu. NOTA: Texto ta scirbi den Papiamento fonetico di Corsou.