Doño di Ling & Sons a disculpa na publico pa loke a sosode

ORANJESTAD – Na vispera di e fecha cu a pone pa continua cu negoshacionnan di CAO pa trahadonan di e supermercado Ling & Sons, gerencia di e compania a kibra su silencio. Den un comunicado emiti awe, e doño di e compania cu ta maneha e supermercado, Gerard van den Tweel, a papia riba e negoshacionnan, pero tambe riba e actuacion di un di e gerentenan, -Jan Hup-, y sigura cu ‘nos lo supera loke a pasa”. Ta despues di dos dia di tabata na Aruba, e doño a dicidi di dirigi su mes na prensa.

PROBLEMA CU JAN HUP

E doño a yega Aruba den fin di siman y a pone su mes na altura di e situacion laboral, y tambe e incidentenan recien cu a sosode cu ta inclui esun cu e gerente Jan Hup. Segun van Tweel, “ Nos compromiso cu Pueblo di Aruba ta keda solido, pa brinda un nivel halto, un experiencia unico, productonan di calidad y fresco pa tur nos clientenan”. E la splica cu su compania ta dirigi e grupo di “Van den Tweel Groep” cu ta consisti di 27 empresa similar tanto na Aruba, Bonaire, Curacao, Surinam y Hulanda. “ Bao di nos direccion ta resorta mas di 1500 empleado cual semper nos a sa di respeta y cumpli cu nan salarionan y beneficionan”. Bisando esaki e loke a sosode na Aruba, no ta normal y como tal e la dicidi di acentua e asunto.

EXCEPCION

Van denTweel a sigui bisa cu loke a sosode na Aruba ta un excepcion, un situacion causa pa falta di comunicacion. “ Nos a tuma nota tambe di e sucedido di Sr. Jan Hup. “Mesora cu mi a wordo poni na altura, mi a desaproba esaki” van den Tweel a bisa. “ Mi a papia cu Sr. Hup y a compronde cu tabata un momento cu tabata reina hopi presion ocasiona dor di varios circumstancia y cu a culmina dor di un walk out di e sindicato”. Segun van den Tweel, Hup a actua robes y a wordo atendi ariba esaki. “ Pesey mes como propietario, mi ta expresa mi disculpa publicamente pa esaki y ta desaproba loke a sosode”.

NEGOSACION RIBA CAO

Pa loke ta e parti laboral y CAO, van den Tweel a splica cu relaciona cu sindicato FTA, Supemercado Ling & Sons ya caba ta na mesa cu sindicato FTA desde basta tempo y nan lo percura pa dentro di un tempo corto, nan por firma e contrato colectivo nobo pa e empleadonan. “Desde principio cu nos empleadonan a expresa nan deseo pa un representacion sindical, nos a bisa cu nos no tin ningun obhecion pa esey” e doño a sigui bisa. E ta convenci cu nan lo sa di supera loke a pasa, bolbiendo bek e pas den nan supermercado, creando un bon atmosfera di trabao pa tur 160 empleadonan y asina sigui brinda un experiencia halto na nos clientenan. “Mi ta gradici tur nos clientenan y pueblo di Aruba pa nan comprencion” van den Tweel a termina bisando.