FIFA update: Jack Warner liber awe nochi bou di fiansa miyonario

PORT OF SPAIN – Ex vice presidente di FIFA y presidente di CONCACAF, Jack Warner ta liber riba pago di fiansa pendiente su caso di corupcion. Awe den dia, mientras cu na Suiza su ‘coleganan’ a keda aresta, e la entrega su mes na polis di Trinidad. E tabata un entrega voluntario di Warner (72), na e warda di polis den e capital, acompaña pa su abogado. Inicialmente a raporta cu e tambe a wordo deteni na Suiza hunto cu su otro 'coleganan'. 

LIBER BOU FIANSA

Warner despues a aparece dilanti un huez, pero a sali liber bou fiansa despues di a paga e suma di 2.5 miyon dollar di fiansa. E tin cu raporta na polis dos biaha pa siman. Y por lo pronto e ta ‘liber’ te 9 di juli ora cu trata su caso. Informacionnan ricibi ta indica cu e lo a entrega su pasaporte tambe.

EXTRADICION

E proximo paso ta, cu Warner ta enfrenta posibel extradicion pa Merca, unda cu e ta wordo acusa di cargonan di corupcion. Mas den dia, Warner a emiti un comunicado, nengando tur culpabilidad.

DECLARACION

E declaracion ta bisa entre otro, cu e ta sigura e pueblo di Trinidad, cu e la retira di FIFA 4 aña pasa y cu e ultimo añanan e la dedica su tempo na mehora tur ciudadano di tur credo y rasa na Trinidad. E ta bisa di a bringa semper contra tur forma di inhusticia, y corupcion. “Mi no a wordo scucha y duna e beneficio di husticia. Mi ta reitera cu mi ta inocente di tur cargo. Mi a retira di futbol, su politica, pa biba na paz riba e isla, unda cu lo mi kier muri”, e declaracion ta finalisa bisando.